Qazaqstan Prezidenti Qasym-Jomart Toqaev Ortalyq Aziia jáne Ázerbaijan memleketteri basshylarynyń VIII Konsýltativtik kezdesýinde óńirdegi ózara saýda kólemin keminde 20 mlrd dollarǵa jetkizýdi usyndy, dep habarlaidy ult.kz.
Memleket basshysynyń aitýynsha, byltyr Ortalyq Aziia elderi arasyndaǵy saýda kólemi shamamen 13 mlrd dollardy quraǵan. Bul memleketterdiń jalpy taýar ainalymynyń shamamen 8 paiyzy.
Osyǵan bailanysty Toqaev úkimetterge ózara saýda úlesin arttyrý úshin birlesken is-qimyl josparyn ázirlep, qabyldaýdy usyndy.
«Ishki naryq áleýeti áli de zor. Sondyqtan úkimetterimizge ózara saýda úlesin arttyryp, osy kórsetkishti keminde 20 milliard dollarǵa jetkizý úshin birlesken is-qimyl josparyn ázirleý jáne qabyldaý jóninde mindet júktegen durys», – dedi Prezident.
Kaspii arqyly júk tasymaly tórt ese ósýi múmkin
Qasym-Jomart Toqaev óńirdegi kólik infraqurylymyn damytýǵa da toqtaldy.
Onyń aitýynsha, Moiynty – Qyzyljar jáne Darbaza – Maqtaaral temirjol jelileriniń qurylysy aiaqtalýǵa jaqyn. Kelesi jyly Baqty – Aiagóz baǵytyn ashý josparlanǵan.
Sondai-aq Qytaidy Kaspii teńizi jáne Eýropa naryǵymen bailanystyratyn Aral – Kaspii magistraliniń qurylysy bastalǵanyn aitty.
Prezident Dúniejúzilik banktiń baǵalaýynsha, josparlanǵan infraqurylymdyq jobalar tolyq júzege assa, 2040 jylǵa qarai Kaspii arqyly júk tasymaly tórt ese ulǵaiýy múmkin ekenin jetkizdi.
Toqaev sý máselesin sheshýge shaqyrdy
Memleket basshysy transshekaralyq sý resýrstaryn basqarýdy Ortalyq Aziia turaqtylyǵy úshin mańyzdy máselelerdiń biri dep atady.
Ol barlyq elderdiń múddesin eskeretin, ózara qurmet pen teńquqylyq qaǵidattaryna negizdelgen jańa tásilder qajet ekenin aitty.
Toqaev Ortalyq Aziianyń sý paidalaný boiynsha negizdemelik konventsiiasyn qabyldaýdy usyndy. Sondai-aq BUU aiasynda Halyqaralyq sý uiymyn qurý bastamasyn birge ilgeriletýge shaqyrdy.
Ortalyq Aziia men Ázerbaijanǵa AI boiynsha seriktestik qurý usynyldy
Prezident jasandy intellekt salasyndaǵy yntymaqtastyqty kúsheitýdi de usyndy.
Qazaqstannyń AI ekojúiesin qalyptastyryp jatqanyn aitqan Toqaev Ortalyq Aziia elderi men Ázerbaijan arasynda jasandy intellekt boiynsha seriktestik qurý múmkindigin qarastyrýdy usyndy.
Onyń aiasynda ǵylymi ortalyqtar, ýniversitetter men tehnologiialyq kompaniialar aqparat jáne tájiribe almasa alady.
Sonymen qatar Qazaqstan Prezidenti neirojelilerdi qaýipsiz ári jaýapkershilikpen paidalaný máselesine nazar aýdaryp, osy baǵytta ortaq deklaratsiia ázirleýdi usyndy.
Aimaq elderi úshin qaýipsizdik máselesi de ózekti
Toqaev terrorizm, esirtki biznesi, qarý-jaraq jáne adam saýdasy, zańsyz kóshi-qon, uiymdasqan qylmys pen alaiaqtyqty óńir qaýipsizdigine tónetin qaterlerdiń qataryna qosty.
Ol tsifrlyq tehnologiialardyń qylmystyq toptar men lańkesterdiń qolyna túsý qaýpine alańdaýshylyq bildirdi.
Prezident sondai-aq Ortalyq Aziia men Ázerbaijan arasyndaǵy mádeni-gýmanitarlyq bailanystardy tereńdetýge shaqyryp, aimaqtyq telearna ashý bastamasyn kóterdi.
