Қазақстан Тәуелсіздігіне 25 жыл

Toqaev aýyl sharýashylyǵyn qoldaý baǵdarlamalaryn tekserýdi tapsyrdy

Toqaev aýyl sharýashylyǵyn qoldaý baǵdarlamalaryn tekserýdi tapsyrdy
Aqorda

Qazaqstanda sońǵy jeti jylda agroónerkásip ónimderiniń eksporty eki ese ósip, 7 milliard dollarǵa jýyqtaǵan. Alaida aýyl sharýashylyǵyn qoldaýǵa arnalǵan baǵdarlamalardyń tiimdiligine kúmán keltirgen Memleket basshysy Úkimetke olardyń barlyǵyna jan-jaqty taldaý júrgizýdi tapsyrdy. Bul týraly Qasym-Jomart Toqaev aýyl sharýashylyǵy eńbekkerleriniń úshinshi forýmynda aitty, dep habarlaidy ult.kz.

Prezidenttiń sózinshe, sońǵy jeti jylda aýyl sharýashylyǵynda birqatar oń ózgeris bolǵan. Atap aitqanda, azyq-túlik óndirisi 28 paiyzǵa ósken. Jalpy quny 2,7 trillion teńge bolatyn 1 630 investitsiialyq joba iske qosylǵan.

Al agroónerkásip ónimderiniń eksporty eki ese ulǵaiyp, 7 milliard dollarǵa jýyqtaǵan. Onyń ishinde óńdelgen ónimniń úlesi 52 paiyzǵa jetken.

Sonymen qatar byltyr sońǵy 20 jylda alǵash ret aýyl sharýashylyǵynyń ulttyq sanaǵy júrgizilip, salanyń naqty jaǵdaiy týraly derekter jinalǵan.

Aýyldy qoldaý baǵdarlamalaryna taldaý júrgiziledi

Memleket basshysy aýyl sharýashylyǵyn qoldaýǵa arnalǵan baǵdarlamalardyń kóptigine nazar aýdardy. Onyń aitýynsha, qazir «Aýyl amanaty», «Aýyl – el besigi», «Keń dala», «Bereke», «Jailaý», «Igilik», «Sybaǵa» jáne basqa da jobalar júzege asyrylyp jatyr.

Alaida Prezident baǵdarlamalardyń sany emes, olardyń naqty nátijesi mańyzdy ekenin atap ótti.

«Biraq sol jumystyń bári qanshalyqty tiimdi júzege asyrylyp jatyr? Menińshe, bul – zańdy suraq. Bizge baǵdarlamanyń sany emes, aýyl sharýashylyǵynyń sapaly damyǵany kerek», – dedi Qasym-Jomart Toqaev.

Osyǵan bailanysty Úkimetke aýyl men agrarlyq sektordy qoldaýǵa arnalǵan baǵdarlamalarǵa jan-jaqty taldaý júrgizý tapsyryldy.

Prezident ár baǵdarlamanyń naqty maqsaty men mindeti bolýy kerektigin, al olardyń nátijesi sharýalarǵa túsinikti bolyp, aýyl turǵyndarynyń turmys sapasyn jaqsartýǵa yqpal etýi tiis ekenin aitty. Sondai-aq bul jumys memleket qarjysyn únemdeýge múmkindik beretinin atap ótti.