Geely Galaxy brendi Qazaqstandaǵy qyzmetiniń jyldyǵyna orai jańa qosylatyn gibridti Monjaro EM-i krossoverin tanystyryp, kólikke aldyn ala tapsyrys qabyldaýdy bastady. Model eki nusqada usynylady. Baǵasy – 14,99 million teńgeden bastalady, dep habarlaidy ult.kz.
Qazaqstandaǵy Allur avtomobilder tobynyń portfelindegi Geely Galaxy brendi jańa Monjaro EM-i gibridti krossoverin naryqqa shyǵardy. Kólik MAX jáne ULTRA dep atalatyn eki jinaqtamada qoljetimdi.
MAX nusqasy aldyńǵy jetekpen jabdyqtalǵan jáne 279 at kúshine ie. Al tolyq jetekti ULTRA nusqasynyń qýaty – 340 at kúshi.
Eki nusqada da 1,5 litrlik benzindi týrbomotor, elektr qozǵaltqyshy jáne úsh satyly 3DHT gibridti transmissiiasy biriktirilgen. Avtokólik PHEV tehnologiiasymen jabdyqtalǵan, iaǵni onyń akkýmýliatoryn syrtqy qýat kózinen zariadtaýǵa bolady. Bul qala ishinde elektr qýatymen júrýge, al uzaq saparlarda gibridti júieni paidalanýǵa múmkindik beredi.
MAX jinaqtamasy 544 N·m ainalý momentin qamtamasyz etedi. Ol saǵatyna 100 shaqyrym jyldamdyqqa 7,7 sekýndta jetedi. Syiymdylyǵy 18,4 kVt·saǵ akkýmýliator bir qýatpen elektr rejiminde 92 shaqyrymǵa deiin júrýge múmkindik beredi. Al jalpy júris qory NEDC tsikli boiynsha 1200 shaqyrymǵa deiin jetedi.
Tolyq jetekti ULTRA nusqasynyń ainalý momenti – 667 N·m. Ol 100 shaqyrym jyldamdyqqa 5,83 sekýndta údeidi. Syiymdylyǵy 29,8 kVt·saǵ akkýmýliatory elektr qýatymen 130 shaqyrymǵa deiin júrýge múmkindik beredi. Jalpy júris qory – 1095 shaqyrymǵa deiin.
Jyldam turaqty tok zariadtaý stantsiiasynda akkýmýliator qýatyn 30-dan 80 paiyzǵa deiin tolyqtyrýǵa MAX nusqasyna shamamen 20 minýt, al ULTRA nusqasyna 15 minýt qajet. Bul ýaqyt zariadtaý stantsiiasynyń qýatyna, aýa temperatýrasyna jáne akkýmýliatordyń jaǵdaiyna bailanysty ózgerýi múmkin.
Keń salon men zamanaýi jabdyqtar
Monjaro EM-i krossoveriniń uzyndyǵy – 4800 mm, eni – 1895 mm, biiktigi – 1700 mm. Dóńgelek bazasy 2845 mm. Júksalǵyshynyń kólemi 633 litrdi quraidy. Artqy oryndyqtardyń arqalyǵyn búktegende bul kórsetkish 1532 litrge deiin ulǵaiady.
Kóliktiń standartty jabdyqtalýyna elektr jetegi bar panoramalyq shatyr, eki aimaqty klimat-baqylaý júiesi, aldyńǵy jáne artqy oryndyqtardy, rýl men aldyńǵy áinekti jylytý fýnktsiialary kiredi.
Sondai-aq Flyme Auto mýltimedialyq júiesi ornatylǵan. Ortalyq ekrannyń ólshemi – 15,4 diýim. Júie Apple CarPlay jáne Android Auto platformalaryn qoldaidy.
Júrgizýshige kómektesetin júieler qatarynda adaptivti krýiz-baqylaý, avtomatty shuǵyl tejeý, jolaqta ustaý kómekshisi, soqyr aimaqtardy baqylaý jáne 540 gradýstyq sholý júiesi bar. Sońǵysy kóliktiń astyndaǵy keńistikti de ekrannan kórýge múmkindik beretin «móldir shassi» fýnktsiiasymen jabdyqtalǵan.
Al joǵary jinaqtamada 25,6 diýimdik W-HUD proektsiialyq displei, 16 dinamikti aýdiojúie, aldyńǵy oryndyqtardy jeldetý jáne massaj jasaý fýnktsiialary qarastyrylǵan. Sonymen qatar ULTRA nusqasynda shýdan qorǵaityn atermaldy aldyńǵy áinek bar.
Kóliktiń baǵasy qansha?
Qazaqstanda Geely Galaxy Monjaro EM-i kóliginiń MAX jinaqtamasy 14 990 000 teńgeden, al ULTRA nusqasy 15 990 000 teńgeden satylymǵa usynylady.
Aldyn ala tapsyrysty Qazaqstandaǵy resmi Geely Galaxy dilerlik ortalyqtarynda rásimdeýge bolady. Ol úshin kólik qunynyń 10 paiyzyn aldyn ala tóleý qajet.
Arnaiy usynys boiynsha aldyn ala tapsyrys berip, 10 paiyz kóleminde tólem jasaǵan alǵashqy 150 klientke qysqy dóńgelekter jiyntyǵy syiǵa beriledi. Klientterdiń kezegi aldyn ala tólem jasalǵan ýaqytqa qarai anyqtalady.
Jinaqtamalar men tapsyrys rásimdeý sharttary týraly tolyq aqparatty resmi dilerlik ortalyqtardan alýǵa bolady.