Bishkekte er adamnyń shabýylǵa jáne jynystyq sipattaǵy zorlyq-zombylyq áreketterine ushyraǵany týraly aryzynan keiin tórt adam ustaldy. Bul týraly Sverdlov aýdandyq ishki ister basqarmasy habarlady, dep jazady ult.kz.
Politsiia málimetinshe, 9 qazanda quqyq qorǵaý organdaryna bir er adam aryzdanǵan. Ol Toktogýl kóshesinde (Gogol kóshesine jaqyn mańda) belgisiz adamdardyń ózine dene jaraqatyn salyp, jynystyq sipattaǵy áreketter jasaǵanyn málimdegen.
Osy derek boiynsha Qyrǵyz Respýblikasynyń Qylmystyq kodeksiniń 207-baby — «Qaraqshylyq» boiynsha qylmystyq is qozǵaldy.
Jedel-izdestirý sharalary barysynda, sonyń ishinde «Qaýipsiz el» jobasy aiasyndaǵy beinebaqylaý kameralarynyń kómegimen militsiia qyzmetkerleri kúdikti tórt adamnyń jeke basyn anyqtady. Olar — T. A., E. A., Z. A. jáne K. A.
Kúdiktiler Sverdlov aýdandyq ishki ister basqarmasyna jetkizilip, keiin Qyrǵyz Respýblikasy Qylmystyq-protsestik kodeksiniń 96-babyna sáikes Bishkek qalalyq ishki ister bas basqarmasynyń ýaqytsha ustaý izoliatoryna qamaldy.
Qazirgi ýaqytta tergeý amaldary jalǵasyp jatyr.
Eske salaiyq, buǵan deiin zardap shekken azamattyń jaqyndary Kaktus.media basylymyna 9 qazan kúni tańǵy saǵat 05:30 shamasynda Toktogýl kóshesinde, Sverdlov aýdandyq prokýratýrasy men Jazalardy oryndaý memlekettik qyzmetiniń ǵimaraty mańynda 2002 jyly týǵan sheteldik azamatqa alty-jeti jas jigittiń shabýyl jasaǵanyn habarlaǵan edi.
Týystarynyń aitýynsha, shabýyl jasaǵandar pyshaqpen qorqytyp, kúsh qoldanatynyn aityp ses kórsetken. Olar er adamnyń telefonyn, aqshasyn jáne basqa da zattaryn tartyp alǵan. Keiin ony aǵashqa bailap, jynystyq zorlyq-zombylyq kórsetken.
Zardap shekken azamattyń jaqyndary onyń militsiiaǵa jáne óz eliniń konsýldyǵyna aryzdanǵanyn da habarlady.
