Shymkentte 10 qazanda ótken Qairat Nurtastyń kontsertine kelgen kórermender kireberiste bolǵan kepteliske bailanysty shaǵymdandy. Áleýmettik jelide halyqtyń nópiri túsirilgen videolar tarap, kontsertke barǵandar bir-birin iterip, keibiri jaraqat alǵanyn jazdy, dep habarlaidy ult.kz.
Áleýmettik jeli qoldanýshylarynyń aitýynsha, birqatar kórermen kontsertke kire almai, uzaq ýaqyt kezekte turǵan. Esik ashylǵan kezde halyq jappai alǵa umtylyp, adamdar bir-birin itergen. Saldarynan keibiri qulap, basqalarynyń aiaǵynyń astynda qalǵany aitylady.
Kontsertke barǵandardyń biri sol sátte tynys ala almai, jerde jatqanyn jazdy. Onyń sózinshe, ózin basqa adamdardyń kómegimen shyǵaryp alǵan. Taǵy bir kórermen kontsertten muryn, qol jáne aiaq jaraqattarymen qaitqanyn aityp, oǵan kim jaýapty bolatynyn surady.
Jeli qoldanýshylarynyń biri jedel járdem kólikterine birden birneshe adamnan tielgenin málimdedi.
«Qairat Nurtastyń kontsertinde qanshama jaraqat, qansha adamnyń esinen tanýy boldy. Birin-biri taptap, basyp ketti. Jedel járdem qyzmetkerleri bir kólikke 7-8 adamnan salyp áketti. Jedel járdemge baryp, sý suraǵandar da kóp boldy. Bireýleri úsh kúnnen beri aýyryp júrgenin aitsa, endi bireýleri tsitramon surap júr», – dep jazdy ol.
Sonymen qatar ol jaǵdaiǵa bailanysty Shymkent turǵyndaryn tutas kinálaý durys emes ekenin meńzep, oqiǵa kezinde adamdardyń qaýipsizdigine jaýapty uiymdastyrýshylardyń áreketin synǵa aldy.
Taǵy bir kórermenniń sózinshe, kireberiste adamdardyń qozǵalysyn rettep, qai baǵytqa júrý keregin túsindiretin mamandar bolmaǵan. Onyń pikirinshe, daýys zoraitqysh arqyly eskertý jasalǵanda, qysylysqa jol bermeýge bolar edi. Sondai-aq kórermender kontserttiń bastalý ýaqyty keshikkenin, bilet tekserý tártibinde de máseleler bolǵanyn jazdy.
Bilet alǵan keibir adam tipti kontsertke kire almai qalǵan.
"Qairat Nurtastyń kontsertyne kire almai qalǵandardyń qatarynda biz de barmyz! 1:30 saǵat kezekte turyp kire almai qaittyq syrtynda adamdar tur, biraq kontsert bastalyp ketken. 40 myń aýaǵa ushty, stýdent edik, jaman kónil qaldy", - dep jazdy bir kórermen.
Freedom Afisha málimdeme jasady
Kompaniianyń málimdeýinshe, kontserttiń uiymdastyrýshysy – Show Service kompaniiasy. Freedom Afisha uiymdastyrýshy belgilegen kvota sheńberinde bilet satqanyn jáne biletterdi tekserý men bilezik berýge eriktilerdi jumyldyrǵanyn aitty.
Al kontsert alańyn daiyndaý, kórermenderdi kirgizýdi uiymdastyrý jáne kúzet jumystary kompaniianyń jaýapkershilik aimaǵyna kirmegenin jetkizdi.
Freedom Afisha oqiǵanyń mán-jaiyn anyqtaýǵa jáne quqyq qorǵaý organdaryna qajetti aqparatty usynýǵa daiyn ekenin málimdedi. Sondai-aq zardap shekkender men oqiǵa týraly aqparaty bar adamdardan +7 771 936 53 53 nómirine nemese help@ticketon.kz elektrondy poshtasyna habarlasýdy surady.
Qazirgi ýaqytta zardap shekkenderdiń naqty sany týraly resmi málimet usynylǵan joq.
Kontsert barysynda bir qyzdyń júregi toqtap qalǵany aityldy. Biraq resmi rastalǵan joq.
