Қазақстан Тәуелсіздігіне 25 жыл

Qoǵamdyq belsendi baspana naryǵyndaǵy deldaldar máselesin kóterdi

Qoǵamdyq belsendi baspana naryǵyndaǵy deldaldar máselesin kóterdi
facebook.com/almat.abdiraman

Almatydan páter izdegende rieltorlardyń biri tek bir bólmeli páterdiń esigin ashyp kórsetkeni úshin 500 myń teńge komissiia suraǵan. Osy oqiǵadan keiin qoǵam belsendisi Almat Ábdiraman rieltorlardyń qyzmetine qatysty másele kóterip, salaǵa biryńǵai talap engizý qajettigin aitty, dep habarlaidy Ult.kz.

Almat Ábdiramannyń aitýynsha, jaqynda qaiyn ápkesine Almatydan páter izdeý kezinde rieltorlardyń qyzmet aqysyna qatysty túsinispeýshilik týyndaǵan. Aqyrynda olar deldaldyń kómegine júginbei, páterdi tikelei iesinen satyp alǵan.

Qoǵam belsendisi rieltorlardyń eńbegine aqy tóleýge qarsy emes ekenin, alaida komissiianyń qandai qyzmet úshin alynatyny naqty bolýy keregin atap ótti.

«Birneshe habarlandyrý jiberip, páterdiń esigin ashyp kórsetkeni úshin be, álde mámileniń basynan aiaǵyna deiin kásibi qyzmet kórsetkenine me? Mine, másele osynda», – dep jazdy ol.

Ol AQSh-tyń Virjiniia shtatynda turǵan kezinde rieltor qyzmetin paidalanǵan tájiribesin de mysalǵa keltirdi. Aitýynsha, onda rieltordyń kimniń múddesin qorǵaityny jáne qyzmet aqysyn kim tóleitini aldyn ala kelisimshartta kórsetiledi. Sonymen qatar, maman bolý úshin arnaiy oqý kýrsynan ótip, emtihan tapsyrý jáne litsenziia alý talap etiledi.

Belsendi Qazaqstanda da rieltorlardyń jaýapkershiligin naqtylaý qajet dep sanaidy. Onyń pikirinshe, bir mámilede satýshydan da, satyp alýshydan da komissiia alý múddeler qaqtyǵysyna ákelýi múmkin. Sondyqtan rieltordyń qai taraptyń atynan jumys isteitini ashyq kórsetilýi kerek.

Almat Ábdiraman elimizde 2021 jyldan beri rieltorlyq qyzmetke arnalǵan ST RK 3702–2020 ulttyq standarty qoldanylyp kele jatqanyn eske saldy. Alaida standarttyń jalpy jaǵdaida erikti bolýy onyń barlyq mamanǵa birdei mindetti talap retinde qoldanylýyna kedergi keltiredi.

«Bir rieltor birneshe páterdiń nusqasyn ǵana usynady. Ekinshisi aptalap izdep, kelissóz júrgizip, qujattardy tekserýge kómektesip, mámileniń qaýipsiz ótýine atsalysady. Ekeýiniń eńbegi birdei me? Árine, joq. Endeshe komissiia da kórsetilgen qyzmettiń kólemi men sapasyna qarai belgilenýge tiis. Aldyn ala kelisilmegen tólemdi keiinnen talap etýge de jol berilmeýi shart», - deidi Ábdiraman..

Sondai-aq ol Saýda jáne integratsiia ministrligi rieltorlyq qyzmetti retteýge qatysty jańa usynystaryn tanystyrǵanyn atap ótti. Bastamalar qatarynda komissiia mólsheri men tóleý tártibin shartta naqty kórsetý, rieltordyń kimniń múddesin qorǵaitynyn belgileý, qyzmetine tapsyrys bermegen adamnan aqy talap etýge jol bermeý máseleleri bar.

Qoǵam belsendisi salaǵa tártip ornatý úshin birneshe usynys aitty. Atap aitqanda:

  • rieltorlardyń biryńǵai memlekettik tizilimin qurý;
  • qyzmet kórsetýge arnalǵan biryńǵai shart úlgisin engizý;
  • mamandardyń kásibi biliktiligine talap qoiý;
  • azamattardyń shaǵymyn qaraityn táýelsiz tetik qalyptastyrý;
  • ereje buzǵan mamandardyń kásibi qyzmetine shekteý qoiý.

Onyń pikirinshe, komissiia mólsherin memleket belgileýi mindetti emes. Qyzmet quny naryqtaǵy báseke men kórsetilgen jumystyń kólemine qarai anyqtalýy múmkin. Biraq klient tólem somasyn aldyn ala bilip, qandai qyzmet úshin aqsha tóleitinin túsinýi kerek.

«Qazir rieltorlar komissiiaǵa kelgende, qansha alý keregin jaqsy biledi. Endi sol komissiianyń esebinen qandai jaýapkershilik arqalaitynyn da biletin ýaqyt keldi», – dep túiindedi Almat Ábdiraman.