«Ádilet» partiiasynyń fraktsiiasy balabaqshalardaǵy balalardyń qaýipsizdigin qamtamasyz etý úshin beinebaqylaý talaptaryn kúsheitýdi usyndy. Depýtat Táttigúl Talaeva Oqý-aǵartý ministri Juldyz Dosbergenova men Ishki ister ministri Erjan Saparbekovke depýtattyq saýal joldady, dep habarlaidy ult.kz.
Depýtattyń aitýynsha, biyl qazanda Astanadaǵy túzetý balabaqshasynda eki tárbielenýshige qatygezdik kórsetilgeni belgili bolǵan. Buǵan deiin Aqtóbe, Shymkent, Temirtaý jáne Pavlodar qalalarynda da osyndai jaǵdailar tirkelgen. Sondai-aq biyl qazanda Jambyl oblysynyń Qordai aýdanynda da alańdatarlyq oqiǵa bolǵan.
Osy jaǵdailardyń birqatarynda bolǵan jaitty anyqtaýǵa beinebaqylaý kameralarynyń jazbalary kómektesken.
«Balabaqshadaǵy balanyń qaýipsizdigi beinejazbanyń kezdeisoq saqtalyp qalýyna nemese balanyń bolǵan jaǵdaidy úlkenderge aityp bere alýyna táýeldi bolmaýy kerek», – deidi depýtat.
Onyń pikirinshe, erekshe bilim berý qajettilikteri bar balalardyń jaǵdaiy airyqsha nazar aýdarýdy qajet etedi. Sebebi olardyń bári birdei ózine ne bolǵanyn túsindirip, kómek surai almaidy.
Depýtat qazirgi beinebaqylaý standarttary negizinen nysandardy kúzetýge baǵyttalǵanyn atap ótti. 2019 jylǵy 23 qańtardaǵy Ishki ister ministrligi men Bilim jáne ǵylym ministrliginiń birlesken buiryǵyna sáikes, toptyq bólmeler, oiyn zaldary men túzetý jumystaryna arnalǵan kabinetter beinebaqylaý mindetti túrde ornatylatyn oryndardyń naqty tizimine kirmegen. Sonymen qatar beinejazbalar keminde 30 táýlik saqtalýy kerek. Al jekemenshik balabaqshalarǵa qatysty biryńǵai talaptar qarastyrylmaǵan.
Osyǵan bailanysty Táttigúl Talaeva ministrlikterge úsh usynys joldady.
Birinshiden, memlekettik jáne jekemenshik balabaqshalarda beinebaqylaý ornatylýǵa tiis bólmelerdiń naqty ári mindetti tizimin bekitýdi usyndy. Bul rette balalardyń jeke ómirine qol suqpaý quqyǵy eskerilýi kerek. Sondai-aq basqa bólmelerge kamera ornatý máselesin balabaqsha basshysynyń óz qalaýyna qaldyratyn normany alyp tastaý qajet.
Ekinshiden, beinekamera ornatýǵa ruqsat etilmeitin bólmelerde táýlik boiy úzdiksiz aýdiojazba júrgizý múmkindigin qarastyrýdy usyndy. Alaida bul shara balalardyń jeke ómirine qol suqpaý quqyǵyn saqtap, jazbalardy qorǵaý jáne olarǵa qoljetimdilikti qatań shekteý talaptary eskerile otyryp, quqyqtyq baǵalaýdan ótýi tiis.
Úshinshiden, beinejazbalardy saqtaý merzimin 30 táýlikten 90 táýlikke deiin uzartýdy usyndy. Sondai-aq ata-analardyń beinejazbalardy suratý tártibin, ótinishterdi qaraý merzimin, basqa balalardyń derekterin qorǵaý jáne arhivtiń saqtalýyna balabaqsha basshylarynyń jaýapkershiligin belgileý qajet ekenin aitty.
«Ata-analar balasyn balabaqshaǵa tapsyrǵanda, ony qaýipsiz ortaǵa berip jatqanyna senimdi bolýy kerek», – dep túiindedi depýtat.