Танымал әнші Жігер Ауыпбаев пен оның жары Муминаның TikTok желісіндегі видеолары қызу талқыға түсті. Ерлі-зайыптылардың жеке өмірі мен ерлі-зайыптылық қарым-қатынасқа қатысты ашық әңгімелері кейбір желі қолданушыларының наразылығын тудырды, деп хабарлайды ult.kz.

Әсіресе олардың тікелей эфирлерде қозғайтын тақырыптары сынға ұшыраған. Пікір білдірушілер мұндай контентті кәмелетке толмаған балалар да көретінін айтып, әлеуметтік желіде белгілі бір әдеп нормалары сақталуы керектігін алға тартқан.

“Мұндай видеоларды балалар да көреді”, “Отбасының жеке өмірін көпшілікке жариялаудың қажеті қанша?”, “Хайп үшін шектен шықпау керек” деген сарындағы пікірлер айтылуда.

Кейбір қолданушылар мұндай эфирлерге шектеу қою қажет деп есептесе, енді бірі әлеуметтік желіде қандай тақырыпты талқылау әр адамның жеке таңдауы екенін алға тартады.

Айта кетейік, Жігер Ауыпбаев жарымен қалай танысқанын айтты.

Жігер Ауыпбаев кім?

Жігер Ауыпбаев – қазақстандық эстрада әншісі, бұрынғы “Меломен” тобының мүшесі. Ол 1987 жылы 3 мамырда Алматы облысы Райымбек ауданына қарасты Кеген ауылында дүниеге келген. Бала кезінен музыкаға қызығушылық танытып, өнер жолын таңдаған.

2005 жылы мектепті тәмамдаған соң Жүсіпбек Елебеков атындағы эстрада және цирк колледжіне оқуға түскен. Мұнда вокал, актерлік шеберлік және сахна мәдениеті бойынша білім алған.

2007 жылы Қайрат Мырзаханов, Ролан Қазретов және Ғабит Әбілдаевпен бірге “Меломен” тобын құрған. Ұжымның “О, махаббат”, “Арман шағала”, “Келеді кездескім” әндері көпшілікке танылды. 2009 жылы топ республикалық “Жас қанат” байқауында жүлделі орын иеленді.

2017 жылдан бастап Жігер Ауыпбаев жеке шығармашылықпен айналыса бастады. Оның репертуарында “Жоғал әрі”, “Ұлың маған ұқсаған”, “Көкжалдар рухы”, “Кішкентай қыз” және “Жаман досым” сияқты әндер бар. Өнер иесі негізінен махаббат, сағыныш, достық және өмір туралы лирикалық шығармаларды орындайды.

Әнші жеке өміріне қатысты жаңалықтарымен де көпшіліктің назарын аударып жүр. 2026 жылы ол сүйіктісі Муминаны жұртшылыққа таныстырып, кейін екеуінің отбасылық өміріне қатысты бейнежазбалар әлеуметтік желіде талқыланды.

Жігер Ауыпбаев бүгінде жеке шығармашылығын жалғастырып, қазақ эстрадасында өнер көрсетіп келеді.