Актриса Жанель Мақажан бұрынғы күйеуі Абай Асылханның ортақ қыздарына үш айдан астам уақыт бойы моральдық әрі материалдық тұрғыда қолдау көрсетпей жүргенін мәлімдеді, деп хабарлайды ult.kz.

Актрисаның айтуынша, Абай отбасынан бөлек кеткен кезде балалардың күтушісіне, балабақшасына, тамағы мен киіміне қажетті шығындарды өз мойнына алуға уәде берген. Алайда Жанель бұл уәденің орындалмағанын айтты.

«Үш айдан астам уақыт болды, балаларға ешқандай моральдық та, материалдық та қолдау жоқ», – деді актриса.

Жанель бұрынғы күйеуінің тойлар мен түрлі шараларда жұмыс істеп жүргенін еститінін айтып, мәселені заң аясында шешу үшін адвокат іздейтінін жеткізді.

Айта кетейік, бұған дейін актриса күйеуімен ажырасып кеткенін айтқан еді. 

Жанель Мақажан кім?

Жанель Мақажан – қазақстандық театр және кино актрисасы. Ол 1987 жылы туған. Т.Жүргенов атындағы Қазақ ұлттық өнер академиясын «драма театры және кино актрисасы» мамандығы бойынша тәмамдаған. 2015 жылдан бері Мұхтар Әуезов атындағы Қазақ мемлекеттік академиялық драма театрының актерлік құрамында өнер көрсетеді.

Актриса көрерменге «Қош бол, Гүлсары!», «Ауылдан қашу», «Алаяқтар», «Көрші», «Балуан Шолақ», «Өмірден кейін» сияқты фильмдер мен телесериалдардағы рөлдері арқылы таныс.

2021 жылы Жанель Мақажан актер әрі жүргізуші Абай Асылханмен отбасын құрған. 2023 жылы олардың ортақ қызы дүниеге келгені жазылған.

Соңғы уақытта актриса жеке өміріне қатысты мәлімдемелерімен де жиі назарға ілініп жүр.