«Қазатомөнеркәсіптің» бұрынғы басшысы Мұхтар Жәкішевтің қызы Алтынай мен Ұлыбритания азаматы Карл Алматыда сән-салтанатымен өткен тойда бас қосты, деп хабарлайды ult.kz.
Мамыр айында Лондонда ресми түрде некесін қиған жас жұбайлар бұл жолы қазақ және британ мәдениетінің элементтерін ұштастырған ерекше той ұйымдастырды.
Әлеуметтік желіде тараған видеоларда күйеу жігіт Карл өз халқының дәстүрлі киімін кисе, қалыңдық ұлттық нақыштағы қызыл көйлек пен сәукеле киіп шыққан. Той барысында қазақтың беташар рәсімі өтіп, ұлттық киім киген шетелдік құдалардың қазақ әуеніне билеген сәті көпшіліктің ықыласына бөленді.
Белгілі болғандай, 1999 жылы дүниеге келген Алтынай қазіргі таңда Лондонда модель болып еңбек етеді. Ал оның жары Карл – Ұлыбританияда бірнеше буыннан бері тұрып келе жатқан нигериялық әулеттің өкілі.
Екі елдің дәстүрі тоғысқан бұл той әлеуметтік желі қолданушылары арасында қызу талқыланып жатыр.
