Жамбыл облысындағы мәрмәр кен орнының 45 миллион теңгеге сатылуына қатысты дау кассациялық сотта қайта қаралмақ. Бір бағалау есебінде кен орны мен жабдықтың құны 47 миллион теңге деп көрсетілсе, басқа сарапшылар пайдалы қазбалардың өзін 1 миллиард теңгеден жоғары бағалаған, деп хабарлайды ult.kz.
Журналист Михаил Козачковтың мәліметінше, көп жыл бойы «Қаратау-Мрамор» ЖШС-не тиесілі болған кен орны 2007 жылы банк несиесіне кепілге қойылған. Кейін берешек өтелмегендіктен, Halyk Bank кепілдегі мүлікті сатуға кіріскен.
Компания иесінің мұрагері Ринат Жетпісбаев қарызды жабу үшін инвестор тауып, банкке 180 миллион теңгеден астам қаражат аударған. Алайда кен орнын сату рәсімі тоқтатылмаған. Нәтижесінде жер қойнауын пайдалану құқығы 45 миллион теңгеге сатылған.
Кен орнының құнына қатысты екі бағалау есебінің арасында үлкен айырмашылық болған. «Факт» бағалау орталығы кен орны мен жабдықты 47 миллион теңгеге бағаласа, «Доверие» компаниясы пайдалы қазбалардың құнын 1 миллиард теңгеден жоғары деп көрсеткен.
Апелляциялық сот сауда хаттамасын жойып, сату-сатып алу шартын жарамсыз деп таныған. Кейін кассациялық сот істі қайта қарауға жіберіп, кен орнының нақты құнын анықтау үшін сараптама жүргізуді тапсырған. Алайда Жамбыл облыстық соты бастапқы шешімін күшінде қалдырған.
Сонымен қатар Бағалаушылар палатасының сарапшылық кеңесі 47 миллион теңгелік есептен қателер тауып, оның заңнама талаптарына сәйкес келмейтінін көрсеткен.
Енді іс кассациялық сотта қайта қаралмақ. Ал кен орнын сатып алған компания оны игеруге кірісіп кеткен. Кен орнының нақты құны мен оны сату заңдылығына қатысты дауға әзірге нүкте қойылған жоқ.
