«Qazatomónerkásiptiń» burynǵy basshysy Muhtar Jákishevtiń qyzy Altynai men Ulybritaniia azamaty Karl Almatyda sán-saltanatymen ótken toida bas qosty, dep habarlaidy ult.kz.
Mamyr aiynda Londonda resmi túrde nekesin qiǵan jas jubailar bul joly qazaq jáne britan mádenietiniń elementterin ushtastyrǵan erekshe toi uiymdastyrdy.
Áleýmettik jelide taraǵan videolarda kúieý jigit Karl óz halqynyń dástúrli kiimin kise, qalyńdyq ulttyq naqyshtaǵy qyzyl kóilek pen sáýkele kiip shyqqan. Toi barysynda qazaqtyń betashar rásimi ótip, ulttyq kiim kigen sheteldik qudalardyń qazaq áýenine bilegen sáti kópshiliktiń yqylasyna bólendi.
Belgili bolǵandai, 1999 jyly dúniege kelgen Altynai qazirgi tańda Londonda model bolyp eńbek etedi. Al onyń jary Karl – Ulybritaniiada birneshe býynnan beri turyp kele jatqan nigeriialyq áýlettiń ókili.
Eki eldiń dástúri toǵysqan bul toi áleýmettik jeli qoldanýshylary arasynda qyzý talqylanyp jatyr.
