Мемлекет басшысы Қасым-Жомарт Тоқаев Маңғыстау облысында әскери оқу-жаттығу кезінде қаза тапқан әскери қызметшілердің отбасы мен жақындарына көңіл айтты, деп хабарлайды ult.kz.
Президент қайғылы жағдайға байланысты қаза болған әскери қызметшілердің туған-туыстарына қолдау білдіріп, олардың отбасыларына қажетті көмек көрсетуді тапсырды.
Сондай-ақ Қасым-Жомарт Тоқаев Үкіметтік комиссияға оқиғаның барлық мән-жайын жан-жақты анықтауды тапсырды. Комиссия әскери қызметшілердің қаза болуына әкелген себептерді зерттеп, оқиғаның мән-жайын анықтауы тиіс.
Айта кетейік, бұған дейін Маңғыстау облысында әскери оқу-жаттығу кезінде қайғылы жағдай болғаны хабарланған еді. Оқиға Каспий теңізіндегі ауа райының күрт нашарлауымен тұспа-тұс келген. Алдын ала мәлімет бойынша, әскери қызметшілер теңіз ағысына түсіп қалған.
Қазіргі уақытта оқиғаның нақты себептері мен барлық мән-жайы анықталып жатыр. Қазақстан Қорғаныс министрлігі мен тиісті қызметтер іздестіру және құтқару жұмыстарын жүргізуде.
Оқиғаға байланысты Үкіметтік комиссия жұмыс істеп жатыр.
