Қазақстанда интернет-алаяқтықпен күрес күшейтіліп, шетелде орналасқан 12 алаяқтық колл-орталықтың қызметі тоқтатылды. Бұл туралы Бас прокурор Берік Асылов мәлімдеді, деп хабарлайды ult.kz.
Оның айтуынша, құқық қорғау органдарының жұмыс тәсілі қылмыс жасалғаннан кейін әрекет етуден қылмыстың алдын алуға қарай өзгеріп келеді.
Мәселен, Ішкі істер министрлігі мен өңір әкімдіктерімен бірлесіп, жасанды интеллект және ұшқышсыз технологиялардың көмегімен азаматтарға қылмыстық қол сұғу қаупі жоғары 360-тан астам локация анықталған.
«Бұл жерлерде полиция патрульдеуі күшейтіліп, 4 мыңға жуық жаңа жарықтандыру нүктесі мен 3,5 мыңнан астам бейнебақылау камерасы орнатылды», – деді Берік Асылов.
Бас прокурордың мәліметінше, қабылданған шаралардың нәтижесінде биылғы бірінші жартыжылдықта елдегі қылмыс деңгейі 11 пайызға төмендеген. Адам өлтіру, қарақшылық, тонау, қорқытып алушылық, ұрлық және көшеде жасалатын қылмыс түрлері де азайған.
Интернеттегі қылмыстарға қарсы күресте де нәтиже бар. Соңғы жылдары алғаш рет интернет-алаяқтықтың өсу үрдісін тоқтатып, оның санын 9 пайызға төмендетуге қол жеткізілген.
Құқық қорғау органдары мен «Қазақтелеком» АҚ бірлесіп, 1 миллионнан астам күдікті қоңырауды тоқтатқан. Сонымен қатар шетелде орналасқан 12 алаяқтық колл-орталықтың қызметі әшкереленген.
Бұдан бөлек, Ұлттық Банктің Антифрод-орталығы арқылы 2,9 млрд теңгеден астам сомаға жасалған алаяқтық транзакциялар бұғатталған.
Ал «Кибернадзор» жүйесі есірткіні насихаттайтын белгілері бар 10 мыңнан астам материалды, оның ішінде 6 мыңнан астам есірткі дүкенін бұғаттаған.
