15–26 маусым аралығында Италияның Монтесильвано қаласында шахматтан 2026 жылғы жастар арасындағы әлем чемпионаты өтеді. U14, U16 және U18 жас санаттарындағы дүбірлі додаға Қазақстан спортшылары да қатысады, деп хабарлайды ult.kz.
Монтесильвано қаласындағы «Pala Dean Martin» конгресс-орталығында өтетін шахматтан жастар арасындағы әлем чемпионатына (FIDE World Youth Chess Championships 2026) әлемнің 87 елі мен аумағынан келген 790 жас шахматшы қатысады. Олардың қатарында 2 гроссмейстер (GM), 24 халықаралық шебер (IM), 1 әйелдер арасындағы гроссмейстер (WGM) және 14 әйелдер арасындағы халықаралық шебер (WIM) бар.
Қатысушылар саны бойынша жарыс қожайындары – Италия құрамасы көш бастап тұр. Олар 64 шахматшыны тіркеген. Қазақстан шахмат федерациясы (KazChess) 35 спортшымен ұсынылған. Сондай-ақ АҚШ-тан – 40, FIDE/Ресейден – 31, Германиядан – 27, Қытай Тайбэйінен – 25 және Норвегиядан – 19 спортшы қатысады.
15–26 маусым аралығында қатысушылар классикалық уақыт бақылауымен швейцариялық жүйе бойынша 11 тур өткізеді. Әр ойыншыға алғашқы 40 жүріске 90 минут, одан кейін партия соңына дейін тағы 30 минут беріледі. Сонымен қатар бірінші жүрістен бастап әр жүріске 30 секунд қосылып отырады. 21 маусым – демалыс күні. Турлар жергілікті уақыт бойынша сағат 15:00-де басталады (Қазақстан уақытымен – 18:00).
FIDE-ден жеке шақырту алғандар қатарында өткен жылғы әлем чемпиондары Данис Қуандықұлы (O12), Марк Смирнов (O14) және Эдгар Мамедов (O16), әлем чемпионатының күміс жүлдегері Сауат Нұрғалиев (O16), сондай-ақ 2025 жылғы Азия чемпионы Мария Холявко (G14) бар.
Қазақстанның 2026 жылғы чемпиондары ретінде Италияға Акерке Молдағали мен Максат Байсалбеков (U14), Асия Асылхан мен Назар Талғатов (U16), Мария Холявко мен Алан Петухов (U18) жол тартты. Ал Қазақстанның 2025 жылғы балалар кубогының жеңімпаздары ретінде Алдияр Жарас (U14) пен Медина Жәкенова (U14) қатысады.
Бұдан бөлек, Елназ Қалиахмет (2025), Зарина Нұрғалиева және Сауат Нұрғалиев (2026) Қазақстанның ересектер арасындағы чемпионаттарында жеңімпаз атанған.
Қазақстан құрамасының қатысушылары (2026 жылғы 1 маусымдағы Эло рейтингі көрсетілген):
G14:
WFM Аланна Берікқызы (2182)
Ақнұр Мамақова (2055)
Далия Диасқызы (1848)
WFM Ханзада Аманжол (1827)
WCM Акерке Молдағали (1805)
WCM Адия Жеңіс (1788)
Алима Өмірсерік (1771)
Медина Жәкенова (1699)
O14:
IM Марк Смирнов (2436)
FM Әлішер Әбдісаттар (2429)
FM Данис Қуандықұлы (2417)
CM Алдияр Жарас (2180)
CM Сүлейман Ахмет (2109)
Максат Байсалбеков (2053)
G16:
WIM Елназ Қалиахмет (2326)
WFM Мария Холявко (2226)
WFM Айару Алтынбек (2114)
Асия Асылхан (2006)
Малика Жаппарбекова (1977)
O16:
IM Сауат Нұрғалиев (2490)
FM Назар Талғатов (2365)
FM Алдияр Жауынбай (2318)
CM Самир Сыздық (2256)
Әдіжан Есенғали (2250)
FM Дінмұхаммед Төлендинов (2249)
G18:
WIM Зарина Нұрғалиева (2312)
WFM Жания Науанова (2039)
O18:
GM Эдгар Мамедов (2464)
FM Мирас Асылов (2409)
FM Алан Петухов (2308)
FM Асман Баянтас (2263)
FM Сұлтанбейбарыс Думанұлы (2257)
FM Әлихан Дәулет (2228)
Бейбарыс Сұлтанбек (2125)
Альтаир Әділбекұлы (2105)
Сондай-ақ 16 маусым күні дәл осы Монтесильвано қаласында U14, U16 және U18 жас санаттары бойынша шахмат есептерін шешуден жастар арасындағы 2-әлем чемпионаты (2nd World Youth Chess Solving Championship 2026) өтеді. Қатысушыларға тапсырмаларды орындау үшін 90 минут беріледі. Әр жас санатында ұлдар мен қыздар арасынан үздік шыққан спортшылар чемпион атанады.
Монтесильвано — Адриатика теңізінің жағалауында орналасқан курортты қала. Ол Абруццо өңіріндегі Пескара провинциясының орталығы Пескара қаласына жақын орналасқан. Жарыс өтетін «Pala Dean Martin» конгресс-орталығы әйгілі америкалық әнші әрі актер Дин Мартиннің құрметіне аталған. Оның әкесі Гаэтано Крочетти Монтесильвано қаласының тумасы болған. Бұған дейін бұл жерде 2023 жылы U14, U16 және U18 жас санаттарындағы әлем чемпионаты, ал 2024 жылы U8, U10 және U12 жас санаттарындағы кадеттер арасындағы әлем чемпионаты ұйымдастырылған болатын.
