Халықаралық World Impact Media Organization (WIMO) ұйымының Reuters ақпарат агенттігінің сайтында жарияланған сараптамалық есебінде Қазақстанның экономикалық өсімі тұрақты әрі әртараптандырылған сипат алып келе жатқаны, елдің инвестициялық тартымдылығы артып, экономиканың шикізатқа тәуелділігі біртіндеп азайып жатқаны атап өтілген, деп хабарлайды ult.kz.
Есеп авторлары бұл нәтижелердің жаһандық экономикадағы тұрақсыздық жағдайында ерекше маңызға ие екенін жазады. Әлемдік экономиканың баяулауы, нарықтардағы құбылмалылық, сауда бағыттарының өзгеруі және инвестициялар үшін бәсекенің күшеюі аясында Қазақстан, WIMO бағалауынша, салыстырмалы түрде тұрақты даму қарқынын сақтап отыр.
Материалда келтірілген негізгі көрсеткіштерге сәйкес, 2025 жылдың қорытындысы бойынша Қазақстанның жалпы ішкі өнімі (ЖІӨ) 6,5%-ға өсті. Ал 2026 жылдың алғашқы бес айында экономика 3,7%-ға ұлғайған. Нақты сектор 4%-ға, қызмет көрсету саласы 3,6%-ға өсті. Өсімнің кең ауқымды болғаны да көрсетілген: құрылыс – 13,4%-ға, өңдеу өнеркәсібі – 9%-ға, көлік және қоймалау – 8,4%-ға, сауда саласы – 5,6%-ға артқан.
Есепте инвестицияларға ерекше назар аударылған. Ондағы мәліметтерге сәйкес, 2025 жылы Қазақстанға тартылған тікелей шетелдік инвестициялар көлемі 20,5 млрд АҚШ долларына жетіп, бір жыл ішінде 14,4%-ға өскен. Сонымен қатар инвестициялық ағындар әртараптандырылып, тек өндіруші сектормен ғана шектелмейтіні атап өтіледі.
Сондай-ақ 2025 жылы greenfield инвестицияларының көлемі 19 млрд АҚШ долларын құрап, Орталық Азиядағы осындай инвестициялардың шамамен 89%-ына тең болғаны айтылған.
WIMO бұл көрсеткіштер Қазақстан экономикасының жаңа кезеңге өткенін көрсететінін атап өтеді. Елдің өсімі енді негізінен инвестициялар, өнеркәсіп және заманауи қызмет көрсету салалары есебінен қамтамасыз етіліп, шикізатқа тәуелділік біртіндеп төмендеп келеді.
Материалда инвестициялық ахуалды жақсартуға бағытталған реформалардың да рөлі ерекше көрсетілген. Олардың қатарында 2030 жылға дейінгі жаңартылған инвестициялық саясат тұжырымдамасы, Инвестициялық штаб тетігі, Ұлттық цифрлық инвестициялық платформа, арнайы экономикалық және индустриялық аймақтар, сондай-ақ ағылшынның жалпы құқық қағидаттарына негізделген «Астана» халықаралық қаржы орталығының мүмкіндіктері бар.
World Impact Media Organization бағалауынша, бұл шаралардың жиынтығы инвесторлар үшін тәуекелдерді азайтып, рәсімдердің ашықтығын арттырады және ұзақ мерзімді инвестициялар үшін қолайлы жағдай қалыптастырады. Сонымен бірге Қазақстанның Сингапур, Катар, Қытай және Сауд Арабиясы сияқты негізгі серіктестерімен инвестицияларды өзара қорғау туралы келісімдер желісін кеңейтіп жатқаны да атап өтілген.
Есепте экономиканы әртараптандыру мәселесіне ерекше мән берілген. Өңдеу өнеркәсібіне, ауыл шаруашылығына, азық-түлік өндірісіне, энергетикаға, көлікке және цифрлық инфрақұрылымға салынатын инвестициялар экономикалық өсімнің жаңа моделінің негізі ретінде қарастырылады. Атап айтқанда, ауыл шаруашылығына инвестициялардың артуы, азық-түлік өнеркәсібінің дамуы, энергетикалық инфрақұрылымның жаңғыртылуы және жаңартылатын энергия көздері саласындағы жобалардың кеңеюі сөз болады.
Осылайша, халықаралық сарапшылар Қазақстанның біртіндеп тұрақтырақ даму моделіне көшіп жатқанын атап өтеді. Бұл модельде негізгі қозғаушы күш ретінде инвестициялар, өнеркәсіп, логистика, агроөнеркәсіптік кешен және заманауи қызмет көрсету салалары қарастырылады. Соның нәтижесінде Қазақстан халықаралық бизнес үшін сенімді әрі болжамды серіктес ретіндегі позициясын нығайтып келеді.
