Қазақстан футбол федерациясы Премьер-лиганың биылғы маусымындағы төрешілерге ықтимал қысым көрсету және күмәнді матчтарға қатысты ақпаратты тексеріп жатыр. Спорттық БАҚ мәліметінше, бірнеше төреші полиграфтан өткен, деп хабарлайды ult.kz.
Тергеудің ортасында Премьер-лиганың 17-турындағы ойындардың бірінен кейін 10 миллион теңге алған болуы мүмкін деген күдікке ілінген төреші бар. Оның аты-жөні, нақты матч және ақша беруге қатысы болуы мүмкін клуб әзірге ресми түрде жарияланған жоқ.
ASnews.kz мәліметінше, төрешілер Қазақстан футбол федерациясының қауіпсіздік және Integrity қызметінің өкілдерінің сұрақтарына жауап берген. Полиграф арқылы тексеру жұмыстары жалғасады. Нәтижесіне қарай кейбір төрешілерге футбол матчтарына қызмет көрсетуге тыйым салынуы мүмкін.
Бұған дейін Қазақстан футбол федерациясы футбол клубтары өкілдерінің бәсекелік артықшылыққа қол жеткізу мақсатында төрешілерге заңсыз ықпал етуге әрекет жасауы мүмкін екені туралы ақпарат бар екенін мәлімдеген.
Ішкі тексеру қорытындысы бойынша бір төреші жарыстарға қатысудан мерзімсіз шеттетілген. Алайда федерация оның аты-жөнін де жариялаған жоқ. Сонымен қатар КФФ-ның ресми мәлімдемесінде болжамды сыйақының көлемі мен оның берілуіне қатысты мән-жайлар нақтыланбаған.
Қазір федерация төрешілерге қысым көрсету, ақша ұсыну және матч нәтижесіне ықпал етудің өзге де түрлері туралы ақпаратты тексеруді жалғастырып жатыр.
Егер заңбұзушылықтар расталса, жинақталған материалдар құзырлы мемлекеттік органдарға берілуі мүмкін.
