Әлеуметтік желілерде Қамшыбек Ташиев қатысқан делінетін жасырын бейнежазба тарады. Кадрларда дауысы мен келбеті бұрынғы Ұлттық қауіпсіздік мемлекеттік комитеті басшысына ұқсайтын адам белгісіз тұлғалармен Қырғызстандағы ықтимал ауқымды наразылықтар туралы әңгімелесіп отырғаны көрінеді, деп хабарлайды ult.kz.
«2005 жылы мен көшеге шамамен 10 мың адамды шығардым, содан кейін бәрі басталды. Қазіргі тыныштық – алдамшы. Адамдар сәл ғана қозғала бастаса, кейін оларды тоқтату мүмкін болмайды», – дейді видеодағы адам.
Әзірге бұл бейнежазбаның түпнұсқалығы билік тарапынан расталған жоқ. Сондай-ақ Ташиевтің бұл сөздерді қашан және қандай жағдайда айтқаны да белгісіз.
Бұрынғы арнайы қызмет басшысы «75-тің хаты» деп аталатын іс бойынша айыпталушы ретінде өтуде. Оған «Билікті күшпен басып алуға әрекет жасау» және «Қызметтік өкілеттігін асыра пайдалану» баптары бойынша айып тағылған. Айыптардың ауырлығына қарамастан, Қамшыбек Ташиев елден шықпау туралы қолхатпен бостандықта жүр және бұрынғыдай ресми іс-шараларға қатысып келеді.
