Қазақстанда 729 азамат мемлекет тағайындаған әлеуметтік төлемдер мен жәрдемақылардан өз еркімен бас тартқан, деп хабарлайды ult.kz Еңбек және халықты әлеуметтік қорғау министрлігіне сілтеме жасап.
Министрліктің мәліметінше, 2026 жылғы қазанда іске қосылған «Әлеуметтік төлемдерден өз еркімен бас тарту» цифрлық сервисін осы уақытқа дейін 729 адам пайдаланған.
Сервис не үшін қажет?
Бұл қызмет материалдық жағдайы жақсы, өзін және отбасын өз бетінше қамтамасыз етуге мүмкіндігі бар азаматтарға мемлекеттік қолдаудан ерікті түрде бас тартуға мүмкіндік береді.
Сервис eGov Mobile мобильді қосымшасында және eGov.kz порталында қолжетімді. Азаматтар мемлекеттік органдарға бармай-ақ, электронды өтініш бере алады.
2027 жылдан бастап не өзгереді?
Министрлік мәліметінше, 2027 жылғы 1 қаңтардан бастап әлеуметтік жәрдемақылардың 36 түрінің 12-сі бойынша мемлекеттік қолдау көрсету тетігі атаулылық қағидатына көшеді.
Яғни көмек бірінші кезекте оған шын мәнінде мұқтаж азаматтарға бағытталады.
Әлеуметтік төлемнен бас тартқан адам кейін қайта өтініш бере ала ма?
Министрлік әлеуметтік төлемдерден бас тарту азаматтың міндеті емес, тек өз еркімен қабылдайтын шешімі екенін атап өтті.
Егер адамның өмірлік жағдайы өзгерсе, ол мемлекеттік қолдауды қайта тағайындау туралы өтініш бере алады. Өтініш қолданыстағы заңнамаға сәйкес қаралады.
Министрлік азаматтарды күмәнді сілтемелерге өтпеуге және сервисті тек eGov Mobile мен eGov.kz ресми платформалары арқылы пайдалануға шақырды.
Бұған дейін 2027 жылдан бастап Қазақстанда кімдердің жәрдемақысы тоқтатылуы мүмкін екенін жаздық.
