Атырауда жедел жәрдем көлігі машинамен соқтығысып, аударылып қалды, деп хабарлайды ҚазАқпарат тілшісі.
«Амандосов – Сатыбалдиев көшелерінің қиылысында бағдаршамның қызыл түсіне өтіп кеткен «Форд» маркалы жедел жәрдем көлігі «Ваз-2114» маркалы машинамен соқтығысты. Соққыдан жедел жәрдем көлігі бір жағына қарай аударылып қалған. Жол-көлік оқиғасынан «Тойота камри» және «Лада Ларгус» маркалы көліктер зақымдалған. Жедел жәрдем каретасында болған екі фельдшер облыстық ауруханаға жеткізілді. Оларға алғашқы медициналық көмек көрсетіліп, үйлеріне жіберілген. «Ваз – 2114» көлігінің жолаушысы да ауруханаға жеткізілген. Жол-көлік оқиғасының мән-жайы анықталып жатыр», - деп хабарлады өңірлік ПД баспасөз қызметінен.
