Алматыда есірткіні жасырын орындарға қалдыру арқылы таратты деген күдікпен кәмелетке толмаған қыз ұсталды, деп хабарлайды ult.kz.
Алматы қалалық Полиция департаментінің Есірткі қылмысына қарсы іс-қимыл басқармасының қызметкерлері Медеу ауданында такси көлігін тоқтатып, ішінде отырған үш кәмелетке толмаған қызды тексерген. Жедел ақпаратқа сәйкес, олардың бірі есірткіні жасырын орындарға қалдыру арқылы таратумен айналысқан деген күдікке ілінген.
Полицияның мәліметінше, қалған екі қыздың бұл әрекеттен хабардар болған-болмағаны және олардың қылмысқа қатысы бар-жоғы тергеу барысында анықталады.
Жеке тінту кезінде күдіктіден түрлі түсті оқшаулағыш таспамен оралған көптеген түйіншек тәркіленген. Алдын ала мәлімет бойынша, олардың құрамынан өсімдік тектес заттар мен кристалл түріндегі синтетикалық есірткі табылған.
Күдікті алғашқы түсініктемесінде есірткіні жасырын орындарға қалдыру арқылы таратқанын мойындаған.
Қазір полицейлер жасөспірімді заңсыз әрекетке кімнің тартқанын, есірткінің жеткізу арнасын және қылмыстық схеманы ұйымдастырушыларды анықтап жатыр.
Сонымен қатар тергеу барысында кәмелетке толмаған қыздың мұндай әрекетке баруына не себеп болғаны, ата-анасының бақылауы мен тәрбиесіне қатысты жағдайлар да жан-жақты зерделенеді.
Полиция ата-аналарды балалардың бос уақытын, интернеттегі байланыстарын және араласатын ортасын тұрақты бақылауда ұстауға шақырды.
