Almatyda esirtkini jasyryn oryndarǵa qaldyrý arqyly taratty degen kúdikpen kámeletke tolmaǵan qyz ustaldy, dep habarlaidy ult.kz.
Almaty qalalyq Politsiia departamentiniń Esirtki qylmysyna qarsy is-qimyl basqarmasynyń qyzmetkerleri Medeý aýdanynda taksi kóligin toqtatyp, ishinde otyrǵan úsh kámeletke tolmaǵan qyzdy teksergen. Jedel aqparatqa sáikes, olardyń biri esirtkini jasyryn oryndarǵa qaldyrý arqyly taratýmen ainalysqan degen kúdikke ilingen.
Politsiianyń málimetinshe, qalǵan eki qyzdyń bul áreketten habardar bolǵan-bolmaǵany jáne olardyń qylmysqa qatysy bar-joǵy tergeý barysynda anyqtalady.
Jeke tintý kezinde kúdiktiden túrli tústi oqshaýlaǵysh taspamen oralǵan kóptegen túiinshek tárkilengen. Aldyn ala málimet boiynsha, olardyń quramynan ósimdik tektes zattar men kristall túrindegi sintetikalyq esirtki tabylǵan.
Kúdikti alǵashqy túsiniktemesinde esirtkini jasyryn oryndarǵa qaldyrý arqyly taratqanyn moiyndaǵan.
Qazir politseiler jasóspirimdi zańsyz áreketke kimniń tartqanyn, esirtkiniń jetkizý arnasyn jáne qylmystyq shemany uiymdastyrýshylardy anyqtap jatyr.
Sonymen qatar tergeý barysynda kámeletke tolmaǵan qyzdyń mundai áreketke barýyna ne sebep bolǵany, ata-anasynyń baqylaýy men tárbiesine qatysty jaǵdailar da jan-jaqty zerdelenedi.
Politsiia ata-analardy balalardyń bos ýaqytyn, internettegi bailanystaryn jáne aralasatyn ortasyn turaqty baqylaýda ustaýǵa shaqyrdy.
