Óskemende internet-dúken arqyly esirtki taratýǵa qatysy bar degen kúdikpen 20 jastaǵy azamat ustaldy. Ol jaldamaly páterde esirtkini ólshep, túiinshekterge bólip, býyp-túiýmen ainalysqan, dep habarlaidy ult.kz.
Polisia.kz málimetinshe, basqa oblystyń turǵyny internettegi «ońai tabys» týraly habarlandyrý arqyly zańsyz jumysqa tartylǵan. Eńbekaqysy kriptovaliýtamen tólengen.
Kúdikti «Qarasora» jedel-profilaktikalyq is-sharasy kezinde qolǵa tústi. Jeke tintý barysynda odan untaq tárizdi zat salynǵan 350 túiinshek tabyldy. Al jaldamaly páterden taǵy 28 túiinshek pen eki ydysqa salynǵan zat tárkilendi.
Saraptama nátijesinde tárkilengen zattyń jalpy salmaǵy 635 gramm bolatyn α-PVP psihotroptyq zaty ekeni anyqtaldy.
Atalǵan derek boiynsha qylmystyq is qozǵaldy. Kúdikti ýaqytsha ustaý izoliatoryna qamaldy.
Politsiia internettegi ońai tabys týraly usynystardyń artynda esirtki saýdasy siiaqty zańsyz áreketter turýy múmkin ekenin eskertti.
