Qyzylorda oblysynda kriptovaliýtany zańsyz aiyrbastap, esirtki saýdasynan túsken aqshany zańdastyrǵan eki adam sottaldy. Olar tsifrlyq aktivter arqyly 1 mlrd teńgeden astam qarjy ainalymyn júrgizgen, dep habarlaidy ult.kz.
Qarjylyq monitoring agenttiginiń málimetinshe, kúdiktiler tiisti ruqsatsyz, «Astana» halyqaralyq qarjy ortalyǵynyń saýda alańdarynan tys jerde Binance platformasynyń P2P qyzmeti arqyly kriptovaliýta saýdasymen ainalysqan.
Nátijesinde olar 1 mlrd teńgeden astam somaǵa tsifrlyq aktivter satyp, zańsyz aiyrbastan 178 mln teńge tabys tapqan.
Sonymen qatar sottalǵandardyń biri esirtki saýdasynan túsken aqshany zańdastyrý shemasyn uiymdastyrǵan. Ol qarjyny qabyldap, ózge shottarǵa aýdarý úshin bank shottaryn paidalanýǵa bergen adamdardy, iaǵni dropperlerdi tartqan. Osy shottar arqyly 600 mln teńgeden astam qarajat ótkizilgen.
Vedomstvonyń habarlaýynsha, túsken aqsha kriptovaliýtaǵa aiyrbastalyp, esirtki saýdagerleriniń kriptoámiiandaryna jiberilgen. Mundai aýdarymdardyń jalpy kólemi 277 myń USDT-ge jetken.
Qylmystyq jolmen tapqan qarajatyna sottalǵandar júk kólikteri men tirkemeler satyp alyp, olardy jaqyn týystarynyń atyna rásimdegen. Keiin tehnikany kásipkerlik maqsatta paidalanyp, zańdy tulǵalarǵa jalǵa bergen.
Sot úkimimen olardyń birine úsh jyl, ekinshisine eki jyl merzimge bas bostandyǵyn shekteý jazasy taǵaiyndaldy. Sonymen qatar tórt arnaiy tehnika men qylmystyq jolmen alynǵan 1 mlrd teńgeden astam tabys memleket paidasyna tárkilendi.
Úkim zańdy kúshine endi.
