Atyraýdaǵy BINOM mektebinde 13 jastaǵy qyzǵa pyshaqpen shabýyl jasaǵan 16 jastaǵy jasóspirim 15 jylǵa bas bostandyǵynan aiyryldy. Sot úkimi alqabilerdiń qatysýymen shyǵaryldy, dep habarlaidy ult.kz Qazaqparatqa silteme jasap.
Eki aidan astam ýaqytqa sozylǵan sot protsesinde jasóspirimniń shabýyldy aldyn ala josparlaǵany anyqtaldy. Onyń dápterlerinen otbasy músheleri men qoǵamǵa degen óshpendiligin bildirgen jazbalar, sondai-aq sheteldegi mektepterge shabýyl jasaǵan qylmyskerlerge qyzyǵýshylyq tanytqany týraly derekter tabylǵan.
Sýdia Zarema Hamidýllinanyń aitýynsha, sottalýshy 13 naýryz kúni mektepke úsh pyshaq, balǵa, qysqash jáne shabýyl jospary jazylǵan dápterin alyp kelgen. Ol shamamen bir saǵattan astam ýaqyt boiy shabýyl jasaityn oqýshyny izdep, sońynda sońǵy sabaǵyna bara jatqan ózine beitanys 13 jastaǵy qyzǵa tap bergen.
Tergeý barysynda onyń dápterlerinen otbasyn, ata-anasyn jáne qoǵamdy jek kóretini, adamdarǵa ziian keltirgisi keletini týraly jazbalar tabylǵan. Sondai-aq áielderge degen óshpendiligin bildirgen jáne otbasyna qatysty burynǵy oiyn júzege asyra almaǵanyna ókingen jazbalary anyqtalǵan.
Sotta jasóspirimniń áleýmettik jeliler men kompiýterlik oiyndarǵa táýeldi bolǵany, tyiym salynǵan internet-resýrstardaǵy materialdarǵa qyzyǵýshylyq tanytqany da aityldy. Aqpan aiynda Ulttyq qaýipsizdik komitetiniń qyzmetkerleri onyń jeke paraqshalarynan dini ekstremistik mazmundaǵy materialdardy anyqtap, teolog mamannyń qatysýymen túsindirý jumysyn júrgizgen.
Sýdianyń sózinshe, sotta zerttelgen materialdar jasóspirimniń tuiyqtalyp, virtýaldy álemge táýeldi bola bastaǵanyn jáne qorshaǵan ortaǵa teris kózqarasy kúsheigenin kórsetken.
Sonymen qatar 2025 jyldyń qazan aiynda jasóspirim mektep psihologine synyptastarynyń ózin mazaqtaityny jóninde shaǵymdanǵan. Sotta onyń esimin burmalaýyna, ulty men syrtqy kelbetine qatysty tiisý faktileri rastalǵan. Alaida júieli túrde uryp-soǵý nemese qorlaý derekteri anyqtalmaǵan.
Memlekettik aiyptaýshy Maira Erjanova bul oqiǵa jasóspirimder arasyndaǵy quqyqbuzýshylyqtyń aldyn alý sharalaryn kúsheitý qajettigin kórsetetinin atap ótti. Onyń aitýynsha, ata-analardyń bala tárbiesindegi jaýapkershiligin arttyryp, bilim berý uiymdary men memlekettik organdar arasyndaǵy bailanysty nyǵaitý mańyzdy.
Osyǵan bailanysty sot Oqý-aǵartý ministri men Atyraý oblysynyń prokýroryna tiisti sharalar qabyldaý týraly jekeshe qaýly shyǵardy.
Sottalýshy Qylmystyq kodekstiń 24-babynyń 3-bóligi jáne 99-babynyń 3-bóligi boiynsha, iaǵni jas balany óltirýge oqtalǵany úshin kináli dep tanyldy. Ol jazasyn kámeletke tolmaǵandarǵa arnalǵan qaýipsizdigi ortasha mekemede óteidi.
Eske salaiyq, oqiǵa biyl 13 naýryzda bolǵan. Aýyr jaraqat alǵan oqýshy aýrýhanaǵa jetkizilip, oǵan shuǵyl ota jasalǵan. Qyz aman qaldy.
