Qyzylorda oblysynda kriptovaliýtany zańsyz aiyrbastap, esirtki saýdasynan túsken aqshany zańdastyrǵan eki adam sottaldy. Olar Binance platformasynyń P2P qyzmeti arqyly 1 mlrd teńgeden astam somaǵa tsifrlyq aktivter satqan, dep habarlaidy ult.kz.
Tergeý málimetinshe, sottalǵandar tiisti ruqsatsyz jáne «Astana» halyqaralyq qarjy ortalyǵynyń saýda alańdarynan tys jerde kriptovaliýta aiyrbastaýmen ainalysqan. Zańsyz operatsiialardan túsken tabys 178 mln teńgege jetken.
Sonymen qatar olardyń biri esirtki saýdasynan túsken aqshany zańdastyrýǵa qatysqan. Ol úshin kúdiktiler ózderiniń bank shottaryn paidalanýǵa bergen adamdardy, iaǵni dropperlerdi tartqan. Osy shottar arqyly 600 mln teńgeden astam qarajat aýdarylǵan.
Keiin aqsha kriptovaliýtaǵa aiyrbastalyp, esirtki satýshylardyń kriptoámiiandaryna jiberilgen. Mundai aýdarymdardyń jalpy kólemi 277 myń USDT bolǵan.
Sottalǵandar qylmystyq jolmen tapqan aqshasyna júk kólikteri men tirkemeler satyp alyp, olardy jaqyn týystarynyń atyna rásimdegen. Keiin tehnikany kásipkerlik maqsatta paidalanyp, zańdy tulǵalarǵa jalǵa bergen.
Sot úkimimen birine úsh jyl, ekinshisine eki jyl bas bostandyǵyn shekteý jazasy taǵaiyndaldy. Sonymen qatar tórt arnaiy tehnika men qylmystyq jolmen alynǵan 1 mlrd teńgeden astam tabys memleket paidasyna tárkilendi.
Úkim zańdy kúshine endi.
