Almatyda Qazaqstan reprodýktivtik meditsina qaýymdastyǵynyń XVIII halyqaralyq kongresi bastaldy. Oǵan 25 elden 1000-nan astam maman qatysyp jatyr. Biylǵy forým elimizde ekstrakorporaldyq uryqtandyrý (EKU) arqyly dúniege kelgen alǵashqy balanyń 30 jyldyǵyna arnaldy, dep habarlaidy ult.kz.
Qazaqstandaǵy alǵashqy EKU sábii 1996 jylǵy 31 shildede dúniege kelgen.
Densaýlyq saqtaý ministri Aqmaral Álnazarovanyń aitýynsha, sońǵy bes jylda elimizde ana ólimi tórt ese, al náreste ólimi 30 paiyzǵa azaiǵan.
Sondai-aq Memleket basshysynyń tapsyrmasymen EKU baǵdarlamalaryn qarjylandyrý kólemi jeti ese ulǵaitylǵan. 2021–2025 jyldary «Ańsaǵan sábi» baǵdarlamasy aiasynda shamamen 34 myń áielge EKU jasalǵan. Onyń 13 myńnan astamy júktilik boiynsha esepke alynyp, nátijesinde 11 myńnan astam sábi dúniege kelgen.
«Bul tsifrlardyń artynda ana men áke bolý armanyn júzege asyrǵan myńdaǵan otbasy tur. Bul – birlesken jumysymyzdyń eń mańyzdy nátijesi», – dedi ministr.
Qazirgi ýaqytta Qazaqstanda qosalqy reprodýktivtik tehnologiialarmen ainalysatyn 32 beiindi klinika bar. Olar jyl saiyn shamamen 18 myń protsedýra júrgizedi. Jalpy, elimizde osy tehnologiialardyń kómegimen dúniege kelgen balalardyń sany 50 myńnan asqan.
Kongress barysynda reprodýktivtik meditsinadaǵy jańa tehnologiialar, jasandy intellektini qoldaný, implantatsiiaǵa deiingi genetikalyq skrining jáne onkofertildilik máseleleri talqylanady.
