Qazaqstanǵa kóship kelýdi josparlaǵan etnikalyq qazaqtar qandas mártebesin alý úshin birneshe kezeńnen ótýi tiis. Olardyń qatarynda qazaq tilinen test tapsyrý, memlekettik organdardyń tekserýi jáne áńgimelesý bar. Bul týraly QR Eńbek jáne halyqty áleýmettik qorǵaý ministrligi túsindirdi, dep habarlaidy ult.kz.
Qandas mártebesin alý rásimi toǵyz kezeńnen turady. Kóship kelýshiler aldyn ala qajetti qujattaryn daiyndap, qonystanatyn óńirdi tańdaýy kerek.
1. Qonystanatyn óńirdi tańdaý
Qazaqstanda qonys aýdarý úshin jeti óńir belgilengen. Kóship kelýshiler aldyn ala sol aimaqtardaǵy turmys jaǵdaiy men jumysqa ornalasý múmkindikterimen tanysýy qajet.
2. Qazaq tilinen test tapsyrý
Úmitkerler testcenter.kz saitynda QAZTEST synaǵynan ótedi. Test tyńdalym jáne oqylym bólimderinen turady. Ár bólimde 60 suraq bar. Tapsyrmalardy sátti oryndaý úshin ár bólimdegi suraqtardyń keminde 70 paiyzyna durys jaýap berý qajet.
3. Saýalnama toltyrý
Úmitker saýalnamada bilimi, eńbek ótili, kásibi daǵdylary, til bilý deńgeii, densaýlyq jaǵdaiy jáne otbasy quramy týraly aqparat beredi. Osy málimetter negizinde baldyq baǵalaý (skoring) júrgiziledi.
4. Memlekettik organdardyń tekserýi
Ótinish berýshi usynǵan málimetterdi Qazaqstannyń Ulttyq qaýipsizdik komiteti men Ishki ister ministrligi tekseredi.
5. Áńgimelesýden ótý
Tekserý aiaqtalǵannan keiin úmitkermen áńgimelesý júrgiziledi. Onyń qorytyndysy boiynsha tiisti sheshim qabyldanady.
6. Qandas mártebesin alý
Baldyq baǵalaýdan sátti ótken úmitker qandas mártebesin berý týraly ótinish bere alady.
7. Memlekettik qoldaý alý
Óńirlik kvotaǵa engizilgen kóship kelýshilerge jol júrý, turǵyn úidi jaldaý jáne kommýnaldyq qyzmetter aqysyn tóleý úshin sýbsidiia qarastyrylǵan.
8. Beiimdelý jáne jumysqa ornalasý
Arnaiy ortalyqtar qandastarǵa qujat rásimdeý, jumys izdeý jáne balalaryn bilim berý uiymdaryna ornalastyrý máseleleri boiynsha kómektesedi.
9. Turaqty turýǵa ruqsat alý
Qazaqstanda turaqty turý úshin tiisti ruqsat alý qajet. Odan keiin elde turýǵa yqtiiarhat rásimdeýge bolady.
Osy kezeńderdiń barlyǵynan ótip, qandas mártebesin alǵan azamattar kóshý, turǵyn úi jáne jumysqa ornalasý boiynsha memlekettik qoldaý sharalaryn paidalana alady.
