Jambyl oblysynda qaza tapqan 19 jastaǵy Madina Rashidqyzynyń denesi týystarynyń talaby boiynsha qaita qazyp alyndy. Marqumnyń jaqyndary alǵashqy sot-meditsinalyq saraptamanyń qorytyndysyna senbeidi, dep habarlaidy ult.kz.
Eksgýmatsiia júrgizilgeni týraly zańger Inga Imanbai men jýrnalist Jan Ahmadiev áleýmettik jelidegi paraqshalarynda habarlady.
Zańgerdiń aitýynsha, jábirlenýshi tarap Almatyda qaitalama komissiialyq sot-meditsinalyq saraptama júrgizýdi talap etken. Osyǵan bailanysty eksgýmatsiia jasalǵan.
Marqumnyń týystary onyń ózine qol jumsaǵanyna kúmán keltiredi.
Jambyl oblysynyń politsiia departamenti bul derek boiynsha Qylmystyq kodekstiń 105-baby («Ózin-ózi óltirýge deiin jetkizý») boiynsha sotqa deiingi tergeý júrip jatqanyn rastady.
Eske salaiyq, biyl tamyzda Jambyl oblysynda 19 jastaǵy jas ana qaza tapqan edi. Onyń artynda segiz ailyq sábii qalǵan.
