Qostanai oblysynda Rýdnyi qalasynyń 19 jastaǵy turǵynyn óltirgen eki azamatqa sot úkimi shyqty. Qylmys biyl qańtarda turǵyn úilerdiń biriniń kireberisinde bolǵan, dep habarlaidy ult.kz.
Qostanai oblysynyń qylmystyq ister jónindegi mamandandyrylǵan aýdanaralyq sotynda eki azamatqa qatysty qylmystyq is qaraldy.
Sot málimetinshe, 2026 jylǵy 23 qańtarǵa qaraǵan túni Rýdnyi qalasyndaǵy P. Korchagin kóshesinde ornalasqan úilerdiń biriniń kireberisinde janjal shyqqan. Oǵan marqumnyń 200 myń teńge talap etýi sebep bolǵan.
Is materialdaryna sáikes, sottalýshy A. jábirlenýshini óltirý maqsatynda oǵan birneshe ret pyshaq suqqan. Alǵan jaraqattarynan 19 jastaǵy jigit oqiǵa ornynda qaza tapqan.
Osy kezde bir qabat tómende bolǵan kámeletke tolmaǵan B. qylmystyń jasalǵanyn bile tura, quqyq qorǵaý organdaryna habar bermegen. Keiin eki sottalýshy oqiǵa ornynan ketip, Kókshetaý qalasyna jasyrynǵan.
Sot jábirlenýshiniń quqyqqa qaishy áreketin qylmysqa sebep bolǵan mán-jai retinde jeńildetetin jaǵdai dep tanydy.
Nátijesinde negizgi sottalýshy A. ortasha qaýipsizdik mekemesinde 9 jylǵa bas bostandyǵynan aiyryldy. Al kámeletke tolmaǵan B. kámeletke tolmaǵandardy ustaýǵa arnalǵan ortasha qaýipsizdik mekemesinde 2 jyl 8 ai jazasyn óteidi.
Sonymen qatar sot A.-dan marqumnyń ákesi men aǵasynyń árqaisysynyń paidasyna moraldyq ziian ótemaqysyn óndirip alý týraly sheshim shyǵardy.
