Tanymal bloger Aiym Altynbekova (Aeka Posh) jas otbasylardyń ata-anasynan bólek turǵany durys dep esepteitinin aitty. Sondai-aq ol kúieýimen qarym-qatynasy men otbasyndaǵy er adamnyń orny týraly pikir bildirdi, dep habarlaidy ult.kz.
Bloger "Aitarym bar" podkastynda kelin men qaiyn jurt arasyndaǵy qarym-qatynasqa toqtalyp, óziniń qaiyn apa retindegi ustanymyn bólisti. Onyń aitýynsha, jas jubailar óz aldyna shańyraq kóterip, jeke ómir súrgeni jón.
Aiym Altynbekova "qaiyn apa" degen ataýdy unatpaitynyn jasyrmady. Ol inisiniń jubaiymen úlkendik tanytyp, bilik júrgizgennen góri, qurbydai aralasýdy jón kóredi.
"Maǵan "qaiyn apa" degen sóz unamaidy. Inimniń kelinshegine "maǵan qurby retinde qarashy" dedim. Qaiyn apa degen otbasyn buzatyn, qorqynyshty, kelip ýyn shashyp ketetin adam siiaqty qalyptasyp ketti. Sondyqtan ondai bolǵym kelmeidi, dos bolǵym keledi", – dedi bloger.
Ol óziniń basynan ótken jaǵdailardy eskerip, inisi men kelininiń bólek turýyna yqpal etkenin jetkizdi. Tipti kelini bastapqyda bólek shyǵýǵa qulyqsyz bolǵanymen, bloger jas jubailardyń jeke ómir súrgenin qalaǵan.
Aiymnyń pikirinshe, ata-enesi qanshalyqty jaqsy adamdar bolsa da, jas otbasynyń óz aldyna bólek turǵany durys. Óitkeni bul erli-zaiyptylardyń derbes ómir súrýine jáne óz jaýapkershiligin sezinýine múmkindik beredi.
Suhbat barysynda bloger kúieýinen ruqsat suraitynyn aityp, kópshilikti tańǵaldyrýy múmkin taǵy bir pikirin ortaǵa saldy. Onyń sózinshe, otbasynda er adamnyń bedeli joǵary bolǵanyn qalaidy. Sondyqtan qandai da bir jerge bararda kúieýimen aqyldasyp, ruqsatyn suraidy.
"Men kúieýimnen suranamyn. Osy podkasttyń ózinde de "meni shaqyryp jatyr, barsam bola ma?" dep suradym. Ol erkek qoi. Men kerisinshe, erkekten suranyp, meniń álemimde erkektiń bir saty joǵary turǵanyn qalaimyn", – dedi ol.
Bloger bul kózqarasynyń qalyptasýyna atasynyń aitqan ósieti áser etkenin de jetkizdi.
"Atam árdaiym "erkegińdi handai kórseń, hannyń áieli bolasyń. Lohtai kórseń, lohtyń áieli bolasyń" deitin", – dedi Aiym Altynbekova.
Sonymen qatar ol kúieýine qaida baratynyn aldyn ala aityp otyrýdy erkindiktiń shektelýi emes, qaýipsizdik pen ózara syilastyqtyń belgisi dep sanaitynyn túsindirdi.
Blogerdiń paiymdaýynsha, otbasylyq ómirde "men mindetti emespin" degen ustanymǵa bailanyp qalmai, erli-zaiyptylar bir-birimen sanasýdy úirenýi kerek.
