Tanymal bloger Rysbala Ikrambai toi ústinde kútpegen syilyqqa ie bolyp, qýanyshtan kózine jas aldy. Ol 300 qonaqtyń arasynan qasietti Mekkege joldama utyp alǵanyn aityp, áserimen bólisti, dep habarlaidy ult.kz.
Blogerdiń aitýynsha, jýyrda joldasymen aqyldasyp, enesin kishi qajylyqqa attandyrǵan. Arada kóp ýaqyt ótpei, dál osyndai sapar ózine de buiyrǵan.
Rysbala Ikrambai bul qýanyshty jańalyqty áleýmettik jelidegi paraqshasynda jariialady. Ol Muhtar Hanzada esimdi dosynyń balasyna arnap uiymdastyrǵan súndet toiyna qatysqan. Merekelik kesh barysynda qonaqtar arasynda Umra saparyna eki joldama oinatylǵan.
"Búgin Muhtar Hanzada dosymyzdyń shańyraǵynda úlken toi boldy. Ata-analyq mindetin atqaryp, súndet toi jasady. Toi qonaqtarynyń arasynda eki janǵa Umra saparyna joldama oinatty. Ǵaiyptan taiyp, toidaǵy 300 qonaqtyń arasynan birinshisin bizdiń otbasyna násip etti. Ekinshisi Ábdijappar Álqojanyń otbasyna buiyrdy", – dep jazdy bloger.
Rysbala bul jaǵdaidy ózi úshin kútpegen syi dep qabyldaǵanyn jasyrmady. Onyń sózinshe, buǵan deiin Mekkege barýǵa júreksinip júrgen.
"Oilańdarshy. Men Mekkege baryp kelgen soń oǵan laiyqty júre almaimyn dep qashyp júrgen edim, búgin toida buiyrtty", – dep aǵynan jaryldy ol.
Osylaisha, bir toida eki otbasy qasietti mekenge joldama ielendi. Bloger qýanyshyn oqyrmandarymen bólisip, bul oqiǵanyń ózi úshin erekshe mánge ie bolǵanyn jetkizdi.
Rysbala Ikrambai kim?
Rysbala (Yrysbala) Ikrambai – qazaqstandyq tanymal bloger, kásipker jáne qaiyrymdylyq sharalaryn uiymdastyrýshy.
Onyń tolyq aty-jóni – Yrysbala Meiramhanqyzy Ikrambai.
Ol kópshilikke alǵash "Qalaýlym" telejobasyna qatysýy arqyly tanyla bastaǵan.
Keiin áleýmettik jelide belsendilik tanytyp, qaiyrymdylyq jobalarymen keńinen tanyldy.
Bloger Shymkent qalasynda tirkelgen "Yrysty" qoǵamdyq qaiyrymdylyq qorynyń basshysy, qor 2023 jylǵy 30 qańtarda tirkelgen. Ol halyqtyń qoldaýymen turmysy tómen otbasylardyń baspanaly bolýyna kómektesip keledi.
Rysbala Ikrambai – tórt balanyń anasy, áleýmettik jelide otbasy, bala tárbiesi jáne qoǵamdaǵy ózekti máseleler týraly pikirin ashyq aityp júr.
