Búginde kópshilikke tanymal qazaqstandyq ánshilerdiń arasynda óner jolyn mektepke barmai turyp bastaǵandar bar. Biri bes jasynda baiqaýda jeńiske jetse, endi biri on jasynda Roza Rymbaevamen birge án shyrqaǵan. Ult.kz bala kezinen sahnaǵa shyǵyp, kórermen yqylasyna bólengen alty ónerpaz týraly derekterdi jinaqtady. 

Dimash Qudaibergen

Dimashtyń ónerge alǵashqy qadamy bala kezinen bastalǵan. Ánshi alty jasynda “Ainalaiyn” respýblikalyq baiqaýynyń fortepiano atalymynda jeńimpaz atanǵan. Onyń bala kúngi jetistigi án aitýmen ǵana shektelmeidi: on jasynda oblystyq is-sharalarda júrgizýshi bolǵan.

Ónerli otbasynda ósken Dimash osylaisha kishkentaiynan aspapta oinap, kópshilik aldynda ózin ustaýdy meńgergen. 

Qairat Nurtas

Qairat Nurtas alǵash ret on jasynda Baiqońyrda sahnaǵa shyqqan. Keiin qalyń tyńdarmanǵa tanylǵan ánshiniń óner joly osy balalyq qadamnan bastaý alady.

Ol 2005 jyly estrada-tsirk kolledjine oqýǵa túsip, 2008 jyly Almatydaǵy Respýblika saraiynda alǵashqy jeke kontsertin ótkizgen. Bala kúngi sahnaǵa degen qyzyǵýshylyǵy osylaisha kásibi shyǵarmashylyqqa ulasqan.

Janar Duǵalova

Janar Duǵalova alty jasynda “Ánshi balapan” baiqaýynyń oblystyq kezeńinde jeńiske jetip, keiin respýblikalyq baiqaýda da top jarǵan.

Ánshiniń balalyq shaǵyndaǵy erekshe sátterdiń biri — Roza Rymbaevamen birge óner kórsetýi. Janar on jasynda “Ainalaiyn” baiqaýynda áigili ánshimen “Liýbov nastala” ánin dýetpen oryndaǵan. 

Álisher Kárimov

Álisher Kárimov te sahnaǵa erte kelgen ónerpazdardyń qatarynda. Ol bes jasynda “Ánshi balapan” baiqaýynda jeńiske jetken.

Kópshilik ánshini keiingi telejobalar arqyly tanyǵanymen, onyń baiqaýlarǵa qatysý tájiribesi balabaqsha jasynan bastalǵan. Ulttyq telearna jariialaǵan málimette bul jeńis onyń óner jolyndaǵy alǵashqy jetistikteriniń biri retinde kórsetilgen.