بٷگٸندە كٶپشٸلٸككە تانىمال قازاقستاندىق ەنشٸلەردٸڭ اراسىندا ٶنەر جولىن مەكتەپكە بارماي تۇرىپ باستاعاندار بار. بٸرٸ بەس جاسىندا بايقاۋدا جەڭٸسكە جەتسە, ەندٸ بٸرٸ ون جاسىندا روزا رىمباەۆامەن بٸرگە ەن شىرقاعان. Ult.kz بالا كەزٸنەن ساحناعا شىعىپ, كٶرەرمەن ىقىلاسىنا بٶلەنگەن التى ٶنەرپاز تۋرالى دەرەكتەردٸ جيناقتادى. 

ديماش قۇدايبەرگەن

ديماشتىڭ ٶنەرگە العاشقى قادامى بالا كەزٸنەن باستالعان. ەنشٸ التى جاسىندا “اينالايىن” رەسپۋبليكالىق بايقاۋىنىڭ فورتەپيانو اتالىمىندا جەڭٸمپاز اتانعان. ونىڭ بالا كٷنگٸ جەتٸستٸگٸ ەن ايتۋمەن عانا شەكتەلمەيدٸ: ون جاسىندا وبلىستىق ٸس-شارالاردا جٷرگٸزۋشٸ بولعان.

ٶنەرلٸ وتباسىندا ٶسكەن ديماش وسىلايشا كٸشكەنتايىنان اسپاپتا ويناپ, كٶپشٸلٸك الدىندا ٶزٸن ۇستاۋدى مەڭگەرگەن. 

قايرات نۇرتاس

قايرات نۇرتاس العاش رەت ون جاسىندا بايقوڭىردا ساحناعا شىققان. كەيٸن قالىڭ تىڭدارمانعا تانىلعان ەنشٸنٸڭ ٶنەر جولى وسى بالالىق قادامنان باستاۋ الادى.

ول 2005 جىلى ەسترادا-تسيرك كوللەدجٸنە وقۋعا تٷسٸپ, 2008 جىلى الماتىداعى رەسپۋبليكا سارايىندا العاشقى جەكە كونتسەرتٸن ٶتكٸزگەن. بالا كٷنگٸ ساحناعا دەگەن قىزىعۋشىلىعى وسىلايشا كەسٸبي شىعارماشىلىققا ۇلاسقان.

جانار دۇعالوۆا

جانار دۇعالوۆا التى جاسىندا “ەنشٸ بالاپان” بايقاۋىنىڭ وبلىستىق كەزەڭٸندە جەڭٸسكە جەتٸپ, كەيٸن رەسپۋبليكالىق بايقاۋدا دا توپ جارعان.

ەنشٸنٸڭ بالالىق شاعىنداعى ەرەكشە سەتتەردٸڭ بٸرٸ — روزا رىمباەۆامەن بٸرگە ٶنەر كٶرسەتۋٸ. جانار ون جاسىندا “اينالايىن” بايقاۋىندا ەيگٸلٸ ەنشٸمەن “ليۋبوۆ ناستالا” ەنٸن دۋەتپەن ورىنداعان. 

ەلٸشەر كەرٸموۆ

ەلٸشەر كەرٸموۆ تە ساحناعا ەرتە كەلگەن ٶنەرپازداردىڭ قاتارىندا. ول بەس جاسىندا “ەنشٸ بالاپان” بايقاۋىندا جەڭٸسكە جەتكەن.

كٶپشٸلٸك ەنشٸنٸ كەيٸنگٸ تەلەجوبالار ارقىلى تانىعانىمەن, ونىڭ بايقاۋلارعا قاتىسۋ تەجٸريبەسٸ بالاباقشا جاسىنان باستالعان. ۇلتتىق تەلەارنا جارييالاعان مەلٸمەتتە بۇل جەڭٸس ونىڭ ٶنەر جولىنداعى العاشقى جەتٸستٸكتەرٸنٸڭ بٸرٸ رەتٸندە كٶرسەتٸلگەن.