Jambyl oblysynyń Merki aýdanynda qaitys bolǵan 19 jastaǵy Madina Rashidqyzynyń denesine eksgýmatsiia jasaldy. Marqumnyń jaqyndary alǵashqy saraptamanyń qorytyndysyna senbeitinin aityp, qaita zertteý júrgizýdi suraǵan, dep habarlaidy ult.kz.
Zańger Inga Imanbaidyń málimetinshe, eksgýmatsiia jábirlenýshi taraptyń ótinishi boiynsha júrgizilgen. Is aiasynda Almatyda qaitalama komissiialyq sot-meditsinalyq saraptama taǵaiyndalǵan. Rásimge politsiia qyzmetkerleri men tiisti mamandar qatysqan.
Madinanyń ólimine qatysty máseleni kóterip júrgen jýrnalist ári bloger Jan Ahmadiev te eksgýmatsiia jasalǵanyn habarlap, marqumnyń otbasyna qoldaý bildirdi.
“Búgin Madina qaryndasymyzǵa eksgýmatsiia jasaldy. Bul — onyń otbasy úshin ǵana emes, qaiǵysyna ortaqtasqan barsha qazaq eli úshin aýyr kún… Jaqyndaryna bul sáttiń qanshalyqty qiyn ekenin túsinemiz. Qaiǵylaryna ortaqtasyp, sabyr men kúsh tileimiz”, – dep jazdy ol.
Jýrnalist istiń aqiqaty anyqtalyp, marqumnyń jaqyndaryn tolǵandyrǵan suraqtarǵa jaýap tabylýyn tileitinin jetkizdi.
“Bar tilegimiz — aqiqat anyqtalyp, kókeidegi suraqtarǵa jaýap tabylsyn, ádildik ornasyn”, – dedi Jan Ahmadiev.
Aita keteiik, Jan Ahmadiev Merkide kóz jumǵan kelinshek týraly tyń derek aitty.
Ne jaǵdai boldy?
Eske salaiyq, Madina Rashidqyzy Jambyl oblysynyń Merki aýdanynda 19 jasynda kóz jumǵan. Qaitys bolǵan kezde artynda segiz ailyq sábii qalǵan. Marqumnyń qurbysy onyń otbasyndaǵy janjaldarǵa shaǵymdanyp, kúieýinen ketkisi kelgenin aitqan. Bul málimdemeler tergeý barysynda tekserilýge tiis.
Jambyl oblystyq politsiia departamentiniń málimetine sáikes, oqiǵa boiynsha ózin-ózi óltirýge deiin jetkizý deregimen sotqa deiingi tergeý júrip jatyr.
Marqumnyń kúieýi is boiynsha qorǵalýǵa quqyǵy bar kýá mártebesinde. Qaitalama saraptamanyń nátijesi ázirge jariialanǵan joq.
