«Million» jaidarman komandasy arqyly tanylǵan ázilkesh Mansar Orynhan saiasatqa qadam basty. Ol Túrkistan oblysy Arys qalalyq máslihatynyń depýtattyǵyna úmitker retinde sailaýǵa qatysatynyn málimdedi, dep habarlaidy ult.kz.
Óner iesi bul jańalyǵyn Instagram paraqshasynda jariialap, negizgi basymdyqtaryn da atady. Onyń aitýynsha, mádeniet pen ónerdi qoldaý, sportty damytý jáne jastardyń áleýetin arttyrýǵa basymdyq bermek.
«Mádenietke qoldaý, sportqa serpin, elge damý! Eldiń eń úlken bailyǵy – adami kapital. Ár azamattyń qabiletin ashý, jastardyń áleýetin qoldaý, ulttyq qundylyqtar men rýhani murany dáripteý – el bolashaǵynyń negizi», – dep jazdy ol.
Sondai-aq Mansar Orynhan mádeniet pen sportty damytý arqyly qoǵamnyń rýhani jáne ziiatkerlik áleýetin kóterý mańyzdy ekenin atap ótti.
Aita keteiik, máslihat depýtattarynyń kezekten tys sailaýy 29 qarashaǵa belgilengen. Buǵan deiin Mansar Orynhan Túrkistan kúres federatsiiasynyń vitse-prezidenti bolyp taǵaiyndalǵan edi.
