Almaty qalasynyń Almaly aýdandyq sotynda Sanjar Boqaev pen ózge de aiyptalýshylarǵa qatysty qylmystyq is boiynsha kezekti sot otyrysy bastaldy. Olarǵa alaiaqtyq, qylmystyq jolmen alynǵan aqshany zańdastyrý, urlyq, aǵashtardy zańsyz kesý jáne kórineý jalǵan aqparat taratý aiyptary taǵylǵan.
Búgingi sottyń qarsańynda «QazTransGaz» AQ bas direktorynyń burynǵy qarjy jáne ekonomika jónindegi orynbasary Dair Kýsherov pen «We Can» JShS direktory Juldyz Artyqbaevadan jaýap alyndy. Olardyń aiǵaqtary milliondaǵan teńgege jasalǵan sharttardyń mán-jaiyna, merdigerlerdi tańdaý tártibine, jumystardyń is júzinde oryndalýyna jáne qarajattyń keiingi qozǵalysyna qatysty boldy.
Atap aitqanda, Dair Kýsherov halyqaralyq avtosherýdi qarjylandyrý máselesi kásipodaq komitetiniń tarapynan qol jinaý arqyly syrttai maquldanǵanyn aitty, buǵan qosa smetalar da esh tekserilmegen. Onyń sózinshe, «BM Trust» jáne «We Can» JShS-laryn tartýdy Boqaevtyń ózi usynǵan, al basqa merdigerler qarastyrylmaǵan. Komitet músheleri Boqaevqa senim artqanymen, kompaniialardyń biriniń onyń jieniniń atyna rásimdelgeninen habarsyz bolǵan.
Avtosherýdi uiymdastyrýdyń mán-jaiyn «We Can» JShS direktory Juldyz Artyqbaeva tolyǵyraq baiandady. Onyń aitýynsha, «We Can» kompaniiasynyń qurylýyna tikelei Boqaev atsalysqan. Buǵan deiin ol Artyqbaevany «BM Trust» kompaniiasyna jumysqa ornalastyrǵan, keiin «QazTransGazdyń» tenderlerine qatysý úshin jeke kompaniia tirkeýdi tapsyrǵan. Kompaniiany tirkeýge qajetti mekenjaidy da ózi bergen. Al sharttardy oryndaý jáne oryndalǵan jumystardy rásimdeý máselelerin Artyqbaeva tikelei Boqaevpen kelisip otyrǵan.
Kýágerdiń málimdeýinshe, onyń kompaniiasy Qazaqstan aýmaǵyndaǵy is-sharany ótkizý jónindegi mindettemelerin 38 mln teńgelik shart aiasynda óz kúshimen oryndaǵan. Ol jumsalǵan shyǵyndardy rastaityn qarjylyq qujattar men túbirtekterdi sotqa usynǵan.
Sonymen qatar, kýáger Boqaevtyń jieniniń atyna rásimdelgen «BM Trust» JShS-men jasalǵan somasy 40 mln teńgeden asatyn ekinshi sharttyń bar ekenin buryn bilmegenin aitty. Artyqbaevanyń sózinshe, bul kompaniia is-sharany uiymdastyrýǵa múlde qatyspaǵan. Onyń ústine, «BM Trust» smetasynda kórsetilgen keibir shyǵyndardy «We Can» JShS buǵan deiin-aq tólep qoiǵan.
Budan bólek, Artyqbaeva Boqaevtyń ótinishi boiynsha júrgizilgen qarjylyq operatsiialar týraly da málimdedi. Atap aitqanda, kýágerdiń jeke bank kartasyna Boqaevtyń «Art romance» jihaz biznesiniń klientterinen dep aitylǵan 9 mln teńgeden astam qarajat túsken. Keiin ol bul aqshany qolma-qol aqshaǵa ainaldyryp, Boqaevqa bergenin aitty. Sondai-aq, Artyqbaeva «BM Trust» JShS-nen túsken 1,5 mln teńgeni qolma-qol aqshaǵa ainaldyrý jáne basqa kompaniianyń esepshotyna aqsha aýdarý jaǵdailaryn da baiandady.
Onyń jaýabynan keiin Boqaevtyń advokattary sottan úzilis jariialaýdy surady. Biraz ýaqyttan soń sot otyrysy qaita jalǵasyp, qorǵaý tarapy kýágerden jaýap alýdy jalǵastyrdy.
