Qazaqstanda mindetti áleýmettik saqtandyrý júiesi jumys istei bastaǵannan beri eńbekke qabilettiliginen jáne asyraýshysynan aiyrylǵan azamattarǵa qosymsha áleýmettik qoldaý kórsetilip keledi. Tek 2026 jyldyń alǵashqy toǵyz aiynda osy sanattaǵy azamattarǵa ondaǵan milliard teńge tólendi, dep habarlaidy ult.kz.
Qazaqstanda mindetti áleýmettik saqtandyrý júiesi 2005 jylǵy 1 qańtardan bastap jumys isteidi. Onyń negizgi maqsaty – jumys isteitin azamattarǵa eńbekke qabilettiliginen, asyraýshysynan aiyrylǵan nemese jumyssyz qalǵan jaǵdaida qosymsha qarjylai qoldaý kórsetý.
Bul júie arqyly tólem alý úshin azamattyń ózi nemese jumys berýshisi onyń atynan áleýmettik aýdarymdar jasaýy kerek.
Búginde Memlekettik áleýmettik saqtandyrý qory (MÁSQ) eńbekke qabilettiliginen, asyraýshysynan aiyrylǵan jáne jumyssyz qalǵan azamattarǵa, sondai-aq ana men balany qoldaýǵa arnalǵan áleýmettik tólemder taǵaiyndaidy.
Mańyzdysy, MÁSQ-dan beriletin tólemder memleket taǵaiyndaityn áleýmettik járdemaqylardyń ornyna júrmeidi. Iaǵni tiisti talaptarǵa sai azamattar eki tólemdi qatar ala alady.
Eńbekke qabilettiliginen aiyrylǵandarǵa qansha tólenedi?
Eńbekke qabilettiliginen aiyrylǵan azamattarǵa respýblikalyq biýdjetten memlekettik áleýmettik járdemaqy beriledi. Oǵan qosa, mindetti áleýmettik saqtandyrý júiesine qatysqan bolsa, MÁSQ-dan qosymsha tólem taǵaiyndalady.
Bul tólem eńbekke qabilettiliginen aiyrylý dárejesi saqtalǵan kezeńde, iaǵni zeinet jasyna jetkenge deiin beriledi. Azamattyń eńbek qyzmetin jalǵastyrýy da tólem alý quqyǵyna áser etpeidi.
2026 jyldyń alǵashqy toǵyz aiynda eńbekke qabilettiliginen aiyrylýyna bailanysty 97,6 myń adamǵa jalpy somasy 45,3 mlrd teńge tólengen. Al júie iske qosylǵannan beri bul maqsatqa 338 mlrd teńge baǵyttalǵan.
Asyraýshysynan aiyrylǵan otbasylarǵa qandai kómek bar?
Asyraýshysynan aiyrylǵan jaǵdaida da otbasy múshelerine respýblikalyq biýdjetten memlekettik járdemaqy jáne MÁSQ-dan qosymsha áleýmettik tólem beriledi.
Tólem qaitys bolǵan adamnyń asyraýynda bolǵan otbasy múshelerine taǵaiyndalady. Balalarǵa ol kámelet jasyna tolǵanǵa deiin tólenedi. Eger kúndizgi bólimde bilim alýdy jalǵastyrsa, tólem 23 jasqa deiin beriledi.
Qazir Qazaqstanda asyraýshysynan aiyrylýyna bailanysty áleýmettik tólemdi 68,5 myń otbasy alyp otyr. Bul maqsatqa MÁSQ-dan 33,3 mlrd teńge bólingen.
Al júie jumys istei bastaǵannan beri asyraýshysynan aiyrylǵan otbasylarǵa arnalǵan tólemderge 236 mlrd teńge baǵyttalǵan.
Osylaisha, mindetti áleýmettik saqtandyrý júiesine qatysý azamattyń ózine ǵana emes, ol ómirden ótken jaǵdaida otbasy múshelerine de qarjylai qoldaý alýǵa múmkindik beredi.
