«Ádilet» partiiasynyń depýtaty Gúlzira Atabaeva platformalyq jumyspen qamtylǵan azamattardyń quqyqtaryn qorǵaý jáne olardyń tabysynyń turaqtylyǵyn qamtamasyz etý máselesin kóterdi. Ol Eńbek jáne halyqty áleýmettik qorǵaý ministrine depýtattyq saýal joldap, tsifrlyq platformalardaǵy tehnikalyq aqaýlar kezinde oryndaýshylardy qorǵaý tetikterin ázirleýdi usyndy, dep habarlaidy ult.kz.
Depýtattyń aitýynsha, Memleket basshysy Qasym-Jomart Toqaev «Qazaqstannyń jańa tarihi kezeńdegi ózekti mindetteri» atty Qazaqstan halqyna Joldaýynda Úkimetke jyl sońyna deiin tsifrlyq jumyspen qamtýdyń ońailatylǵan quqyqtyq rejimin qalyptastyrýdy tapsyrǵan.
Eńbek jáne halyqty áleýmettik qorǵaý ministrliginiń málimetinshe, 2026 jylǵy qyrkúiektegi jaǵdai boiynsha Qazaqstanda 35 internet-platforma operatory arqyly qyzmet kórsetetin 956 myńǵa jýyq oryndaýshy bolǵan. Aldaǵy ýaqytta platformalyq ekonomikaǵa tartylatyn azamattardyń sany arta túsýi múmkin.
Gúlzira Atabaeva platformalyq jumyspen qamtylǵan azamattardyń quqyqtaryn qorǵaý «Ádilet» partiiasynyń sailaýaldy baǵdarlamasynda da qarastyrylǵanyn atap ótti. Atap aitqanda, jumyspen qamtýdyń ikemdi nysanyn saqtai otyryp, qyzmetkerlerge bazalyq áleýmettik kepildikter berý, áleýmettik tólemderdiń ashyq tártibin qalyptastyrý jáne platforma men oryndaýshy arasyndaǵy jaýapkershilikti naqtylaý kózdelgen.
Depýtat bul baǵyttaǵy ózekti máselelerdiń biri retinde tsifrlyq platformalardaǵy tehnikalyq aqaýlardy atady. Máselen, Yandex Go servisindegi irkilis saldarynan taksi júrgizýshileri men kýrerler ýaqytsha tapsyrys qabyldap, tabys tabý múmkindiginen aiyrylǵan. Buǵan qosa, keibir oryndaýshylar tapqan qarajatyn shyǵaryp alýda qiyndyqtarǵa tap bolǵany týraly habarlamalar túsken.
«Bul jaǵdai bir ǵana jeke tsifrlyq platformanyń tehnikalyq aqaýy júzdegen myń azamattyń jumyspen qamtylýy men tabysyna tikelei áser etip, olardyń bir mezette jumys isteý múmkindiginen aiyrylýyn kórsetti», – dedi depýtat.
Osyǵan bailanysty Gúlzira Atabaeva Úkimetke platformalyq jumyspen qamtýdyń eńbek naryǵyna tóndiretin táýekelderine keshendi baǵalaý júrgizýdi usyndy. Sonymen qatar tsifrlyq platformalardaǵy jappai tehnikalyq aqaýlarǵa den qoiý jónindegi vedomstvoaralyq jospar ázirleý qajettigin aitty.
Onyń pikirinshe, mundai jospar memlekettik organdar men platforma operatorlarynyń ózara is-qimyl tártibin, azamattardy shuǵyl habardar etý jáne tapsyrystarǵa qoljetimdilikti qalpyna keltirý algoritmin qamtýy kerek. Sondai-aq bereshekti jedel óteý men zardap shekken oryndaýshylarǵa erikti ótemaqy tóleý baǵdarlamalaryn qarastyrý mańyzdy.
Budan bólek, depýtat uzaqqa sozylǵan tehnikalyq aqaýlar kezinde oryndaýshylardyń múddesin qorǵaityn praktikalyq tetikterdi tsifrlyq platforma operatorlarymen birlesip pysyqtaýdy usyndy.
«Tsifrlyq jumyspen qamtýdy damytý azamattarǵa platforma arqyly tabys tabý múmkindigin berýmen ǵana shektelmeýi kerek. Olar osy tabys kóziniń turaqtylyǵy men senimdiligine de senimdi bolýy qajet», – dep túiindedi Gúlzira Atabaeva.
