Búgin Qaskeleń qalasynyń Mádeniet úiinde Memleket basshysy Qasym-Jomart Toqaevtyń 28 qazanda jariialaǵan «Jańa tarihi kezeńdegi Qazaqstannyń ózekti mindetteri» atty Qazaqstan halqyna Joldaýyn túsindirýge arnalǵan kezdesý ótti.
Jiynǵa Qazaqstan Respýblikasy Energetika vitse-ministri Qaiyrhan Serikuly Tutqyshbaev, «Ádilet» partiiasynan Qazaqstan Respýblikasy Quryltaiynyń I shaqyrylymynyń depýtaty, Áleýmettik-mádeni damý komitetiniń múshesi Arman Serikuly Jansengirov jáne Qazaqstan Halyq Keńesiniń múshesi Nursultan Jumabaiuly Orynbasarov qatysty. Sonymen qatar kezdesýge aýdannyń bilim salasynyń ókilderi men jastar qatysty.
Kezdesý barysynda spikerler Memleket basshysynyń Joldaýynda aiqyndalǵan basym baǵyttarǵa toqtalyp, eldiń áleýmettik-ekonomikalyq damýy men qoǵam aldyndaǵy ózekti mindetter jóninde pikir bildirdi.
Alǵashqy bolyp sóz alǵan Energetika vitse-ministri Qaiyrhan Serikuly Tutqyshbaev energetika salasyn damytý, eldiń energetikalyq qaýipsizdigin qamtamasyz etý, infraqurylymdy jańǵyrtý jáne salanyń turaqty damýy baǵytyndaǵy mindetterge toqtaldy.
Óz kezeginde Quryltai depýtaty Arman Serikuly Jansengirov áleýmettik-mádeni salany damytýǵa baǵyttalǵan bastamalarǵa toqtalyp, bilim berý júiesin jetildirý, inkliýzivti bilim berýdi damytý, erekshe bilim berý qajettilikteri bar balalarǵa qolaily jaǵdai jasaý jáne pedagogterdiń mártebesin arttyrý máselelerin atap ótti.
Al Qazaqstan Halyq Keńesiniń múshesi Nursultan Jumabaiuly Orynbasarov óz sózinde Joldaýda belgilengen ekonomikalyq jáne áleýmettik reformalardyń mańyzdylyǵyna nazar aýdardy. Atap aitqanda, «Halyqtyq qurylys» baǵdarlamasy aiasynda mektepter, aýrýhanalar men ózge de áleýmettik nysandar salý, aýyl sharýashylyǵyn qoldaý, óńirlerdiń infraqurylymyn damytý jáne azamattardyń tabysyn arttyrý baǵyttaryn atap ótti. Sonymen qatar reformalardy júzege asyrýda qoǵamdyq birlik, zań men tártip jáne adal eńbektiń mańyzyn jetkizdi.
Jiynda bilim berý salasyna qatysty mindetter de keńinen talqylandy. Atap aitqanda, bilim berý infraqurylymyn jetildirý, bilikti mamandar tapshylyǵyn azaitý, muǵalimderdiń jumys júktemesin ońtailandyrý jáne artyq eseptilik pen qaǵazbastylyqty joiý máselelerine erekshe nazar aýdaryldy.
Memleket basshysy óz sózinde: «Ustazdyń negizgi missiiasy – balaǵa sapaly bilim berý, iaǵni saýatty, sanaly urpaq tárbieleý», – dep atap ótip, pedagogterdiń negizgi jumysyna kedergi keltiretin artyq eseptilik pen qaǵazbastylyqty joiý qajettigin tapsyrǵan bolatyn.
Sondai-aq erekshe bilim berý qajettilikteri bar balalarǵa arnalǵan infraqurylymdy damytý, tiisti mamandarmen qamtamasyz etý jáne balalardyń damý erekshelikterin erte jastan anyqtaý jumystarynyń mańyzdylyǵy aityldy.
Kezdesý sońynda qatysýshylar ózderin tolǵandyrǵan saýaldaryn qoiyp, arnaiy kelgen spikerlermen ashyq pikir almasty. Jiyn barysynda kóterilgen máseleler boiynsha usynystar aitylyp, ózekti suraqtarǵa jaýap berildi.
