Qazaqstanda eńbekqorlyq, bilim men ǵylymdy dáriptep, eskilik pen radikalizmdi nasihattaityn áreketterge tosqaýyl qoiý qajet. Bul týraly vitse-prezident Erlan Qarin ishki saiasat máseleleri jónindegi respýblikalyq keńeste málimdedi, dep habarlaidy Aqorda.
Onyń aitýynsha, eldegi qoǵamdyq ómirdiń barlyq salasynda jańǵyrý júrip jatyr. Sondyqtan qoǵamnyń qundylyqtary da zaman talabyna sai ózgerýi kerek.
«Halyq arasynda eńbekqorlyq, bilim, ǵylym jáne progress sekildi jasampaz qundylyqtardy dáripteý óte mańyzdy. Sonymen qatar eskilikti, toǵysharlyqty, radikalizmdi nasihattaityn kez kelgen áreketke qatań tosqaýyl qoiý kerek. Kópshilik ortada aragidik ushyrasatyn túrli shekten tys áreketter men mádenietsizdikke adamdardyń ózi qarsy ekenin kórip júrmiz. Bul qoǵam mádenieti men qundylyqtardyń ózgere bastaǵanyn bildiredi», – dedi Erlan Qarin.
Vitse-prezident memlekettik basqarý júiesin de zaman talabyna beiimdeý qajettigin atap ótti. Ásirese tsifrlandyrý men jasandy intellekt negizinde qalyptasyp jatqan jańa ekonomikaǵa sai basqarý modelin damytý mańyzdy.
Onyń sózinshe, memlekettik organdardyń halyqpen bailanys ornatý tetikterin jetildirip, ortalyq memlekettik organdar men óńirlerdiń bailanys ortalyqtaryn biryńǵai tsifrlyq platformaǵa biriktirý qajet.
Jiynda budan bólek etnosaralyq jáne konfessiiaaralyq kelisimdi nyǵaitý, qoǵamdyq birlestiktermen jáne sarapshylarmen bailanys ornatý máseleleri talqylandy. Sondai-aq otbasy, jastar, aqparattyq jáne mádeni-gýmanitarlyq saiasattyń basym baǵyttary qaraldy.
