Almaty qalasynyń Almaly aýdandyq sotynda «QazaqGaz» UK» AQ Táýekelderdi basqarý departamentiniń bas menedjeri Medetbek Ábdiqalyqovtan jaýap alý jalǵasty. Kýágerdiń sózindegi nazar aýdarýǵa laiyqty jaittardyń biri Sanjar Boqaevtyń baqylaýyndaǵy kompaniialardyń kásipodaqtan qarjylandyrýdy naqty qalai alǵany týraly málimetter boldy.
Sot protsesine qatysýshylardyń suraqtaryna jaýap bergen Ábdiqalyqov «BM Trust» men «We Can» kompaniialaryn tańdaýdy kásipodaq komitetiniń otyrysynda Sanjar Boqaevtyń ózi usynǵanyn aitty. Kýáger bul jaǵdaidyń aqylǵa syimaitynyn atap ótti. Óitkeni aiyptalýshy kásipodaq komitetiniń múshesi bolmaǵan jáne otyrysqa tek shaqyrylǵan qonaq retinde qatysqan. Soǵan qaramastan, beiindi komitet basqa ivent-agenttikterdi izdemei, balama nusqalardy talqylamaǵan. Boqaevtyń usynysymen qos kompaniia da balamasyz maquldanǵan.
Óz kezeginde Boqaevtyń advokattary kýágerdiń ishki aýditorlyq esebin qorytyndy aiyptaý aktisi retinde kórsetýge tyrysyp, ony zańnyń qaltarystarymen tyǵyryqqa tireýge árekettendi. Alaida smetalardyń negizsiz ulǵaitylǵany rastalǵannan keiin Ábdiqalyqov bul týraly basshylyqqa baiandaǵan. Al basshylyq óz kezeginde Qarjylyq monitoring agenttigine (QMA) resmi túrde júgingen. Shemalarǵa túpkilikti quqyqtyq baǵany tergeý organy bergen.
Qorǵaýshylar bir suraqty birneshe ret qaitalap qoidy. Nátijesinde osyndai taktikanyń saldarynan bir revizordan jaýap alý jasandy túrde bes saǵatqa sozylyp, áli de jalǵasyp jatyr.
