Almaty qalasynyń Almaly aýdandyq sotynda «Nur Otan» partiiasynyń burynǵy ideology ári «QazTransGaz» basshysynyń eks-keńesshisi Sanjar Boqaevqa qatysty sot protsesi jalǵasyp jatyr. Búgingi sot otyrysyndaǵy basty oqiǵa – «QazaqGaz» UK» AQ Táýekelderdi basqarý departamentiniń bas menedjeri, sondai-aq kásipodaqtyń tekserý komissiiasynyń múshesi Medetbek Ábdiqalyqovtyń jaýaby boldy. Qarjylyq aýdit salasynda 20 jyldyq tájiribesi bar maman sharttar arqyly jasalǵan zańsyz áreketterdiń qalai anyqtalǵanyn jáne qorǵaý tarapynyń ýájderi nelikten negizsiz ekenin egjei-tegjeili túsindirdi, dep habarlaidy ult.kz.
Ábdiqalyqov sotqa avtosherý boiynsha kelisimshartty arnaiy izdestirmegenin aitty. Tekserý komissiiasynyń debitorlyq bereshekti zerdeleý jónindegi ádettegi jumysy aiasynda ol kásipodaqtyń barlyq qarjylyq qujattary men sharttaryn qarastyrǵan. Ádette tekserý komissiiasy qyzmet babynda kez kelgen kezeńdi qamtityn qujattardy qarai alady, al komissiianyń árbir múshesi óz beiinine sáikes baǵytty zerdeleidi.
Jobany júzege asyratyn kompaniiany tańdaýdyń negizdiligin jáne olardyń «QazTransGaz» qyzmetkerlerimen yqtimal bailanysyn anyqtaý maqsatynda aýditor kontragentterdi Adata servisi arqyly teksergen. Taldaý barysynda ol birqatar kúmándi jaittarǵa nazar aýdarǵan. Is-sharalardy uiymdastyrý salasy (ivent-indýstriia) básekelestik joǵary naryq bolǵanyna qaramastan, sharttar únemi bir ǵana kompaniialarmen – «BM Trust» jáne «We Can» JShS-terimen bekitilgen.
Shyǵyndar smetasyn zerdeleý kezinde tekserýshi kórsetilgen qyzmetterdiń qunyn qoldan qymbattatý belgileri men júzege asyrýshy kompaniialardyń ózara bailanysty ekenin anyqtaǵan. Atap aitqanda, «BM Trust» kompaniiasynyń atynan Boqaevtyń jieni ókildik etken. Mamandyǵynyń tájiribesine súiengen kýágerdiń aitýynsha, mundai qujattardan naqty jumys isteitin ivent-agenttikter men tek qaǵaz júzinde qurylǵan bir kúndik kompaniialardyń aiyrmashylyǵy birden baiqalady.
Zańbuzýshylyq belgilerin anyqtaǵannan keiin Ábdiqalyqov tiisti qorytyndy jasap, materialdardy quqyq qorǵaý organdaryna joldaǵan. Sotta ol tek óz jumysyn sapaly ári adal atqarǵanyn atap ótti.
«Men qarajatty jymqyrý belgilerin kórdim jáne únsiz qala almadym. Qandai da bir blogerden qorqatyn jaiym joq. Kúmándi sharttardy quqyqtyq baǵa berý úshin joldaý – meniń mindetim», – dedi ol.
Aýditor kásipodaq qarajatyn avtosherýdi qarjylandyrý úshin paidalanýdyń zańdylyǵyna da erekshe toqtaldy. Kýágerdiń aitýynsha, uiym qarajatynyń naqty ári qatań maqsatty baǵyty bar. Ol qarajat eńbek quqyqtaryn qorǵaýǵa, sondai-aq kásipodaq múshelerine materialdyq jáne áleýmettik qoldaý kórsetýge jumsalýy tiis.
Tekserýshiniń baǵalaýynsha, imidjdik is-sharalardy qarjylandyrý uiym jarǵysynda kózdelgen mindetterge sáikes kelmeidi. Qymbattatylǵan smetalar arqyly shyǵarylǵan ondaǵan million teńge qyzmetkerlerge naqty kómek kórsetýge, máselen, olardyń qataryndaǵy jalǵyzbasty analarǵa qoldaý kórsetýge paidalanylýy múmkin edi.
Ábdiqalyqov Sanjar Boqaevtyń kásipodaq komitetimen qarym-qatynasynyń sipatyna da toqtaldy. Bas direktordyń keńesshisi bolǵan kezeńde aiyptalýshy kásipodaq otyrystaryna sirek jáne tańdamaly túrde qatysatyn. Ol tek qarjy bólý máseleleri qaralatyn kezde ǵana kelgen eken. Kýáger mundai áreketti táýelsiz kásipodaq uiymynyń ishki jumysyna tikelei aralasý retinde baǵalady.
Jaýap alý barysynda Boqaevtyń advokattary qorǵaý ustanymyn formaldy rásimderdiń ainalasynda qurýǵa tyrysty. Olar kásipodaqtyń memlekettik qurylym bolyp sanalmaitynyn, sondyqtan oǵan memlekettik satyp alý týraly zań talaptary qoldanylmaitynyn alǵa tartty. Sondai-aq, olardyń pikirinshe, múddeles kompaniialardy tańdaýǵa zań júzinde tikelei tyiym salynbaǵan. Osy ýájderge súiene otyryp, qorǵaý tarapy Boqaevtyń kásipodaqqa óz jienine tiesili JShS-ni usynýǵa quqyǵy bolǵanyn dáleldeýge tyrysty.
Osy saýal-jaýap barysynda sot zalyndaǵy ahýal shielenise tústi. Prokýrordyń aitýynsha, advokattar kýágerdi jańylystyrýǵa tyrysyp, suraqtaryn tujyrym túrinde qoia bastaǵan. Aýditordyń dáiekti jaýaptaryna tótep bere almaǵan Sanjar Boqaevtyń ózi de otyrǵan jerinen daýysyn kóterip, kýágerdiń sózin bólýge tyrysty.
«Eger siz biz qarajatty jymqyrdyq dep esepteseńiz, nege bizdi toqtatpadyńyz? Nege bul sharttardyń jasalýyna jol berdińiz?» – dep aiqailady aiyptalýshy.
Medetbek Ábdiqalyqov oǵan sabyrmen jaýap berdi:
«Sebebi men kompaniiaǵa 2022 jyly, siz ótkizgen avtosherýden bes jyl ótken soń ǵana keldim».
