Soltústik Qazaqstan oblysynda politseiler tekserý kezinde 1,7 tonnaǵa jýyq balyq tielgen GAZel kóligin toqtatty. Júk arasynan eki motorly qaiyq pen balyq aýlaýǵa arnalǵan aýlar da tabyldy, dep habarlaidy ult.kz.
Oqiǵa Aqjar aýdanynda bolǵan. Politsiia málimetinshe, kólik júrgizýshisi – Aqmola oblysynyń 49 jastaǵy turǵyny. Ol internettegi habarlandyrý arqyly júk tasymaldaýǵa tapsyrys alǵanyn aitqan. Júkti Aqjar aýdanyndaǵy aýyldardyń birinen Kókshetaýǵa deiin jetkizýge 70 myń teńgege kelisken.
Tapsyrys berýshiler tasymaldyń zańdylyǵyn rastaityn qujattardy keiin usynýǵa ýáde bergen. Alaida qajetti qujattary bolmasa da, júrgizýshi jolǵa shyqqan. Osyǵan bailanysty ol aýdandyq politsiia bóliminde túsinikteme berdi.
Zańsyz balyq aýlaý deregi boiynsha qylmystyq is qozǵaldy. Tergeý barysynda kúdikke ilingen eki adam anyqtaldy. Olar – Túrkistan oblysynyń 32 jáne 33 jastaǵy turǵyndary.
Kúdiktiler balyqty Maiskoe aýyly mańyndaǵy kólden aýlaǵanyn aitqan. Qazir politseiler brakonerlikke qatysy bar ózge de adamdardy anyqtap, basqa da zańsyz balyq aýlaý derekterin tekserip jatyr.
Politsiia málimetinshe, «Taza Qazaqstan» jalpyulttyq ekologiialyq aktsiiasy aiasynda tabiǵatty qorǵaý baǵytyndaǵy reidter turaqty júrgiziledi.
Biyl toǵyz aida Soltústik Qazaqstan oblysynda zańsyz balyq aýlaýdyń 11 deregi jáne zańsyz ań aýlaýdyń 4 deregi tirkelgen.
