Soltústik Qazaqstan oblysynda ońtústikten kóship keletin azamattarǵa arnap salynǵan 14 úi buzylyp jatyr. Quny 112 million teńgege jýyq baspanalar qurylysy aiaqtalǵannan keiin-aq apatty dep tanylyp, birneshe jyl boiy bos turǵan, dep habarlaidy ult.kz.
«Vremia» portalynyń málimetinshe, oqiǵa Sergeevka qalasynda bolǵan. Jergilikti turǵyndardyń aitýynsha, úiler osydan 6-7 jyl buryn salynǵanymen, eshkim qonystanbaǵan. Keiin baspanalar apatty dep tanylyp, endi olardy buzý jumystary bastalǵan.
Bir úidiń qurylysyna shamamen 8 million teńge jumsalǵan. Osylaisha, 14 baspananyń jalpy quny 112 million teńgege jýyqtaǵan. Al sol mańdaǵy turǵyndar kezinde ózderi turyp kelgen úilerin 4 million teńgege de sata almaǵan.
Shal aqyn aýdanynyń ákimdigi baspanalardyń buzylýyna qatysty túsinikteme berdi. Resmi málimetke sáikes, tehnikalyq tekserý nátijesinde úiler apatty dep tanylǵan.
«Atalǵan úiler tehnikalyq tekserý aktisine sáikes apatty dep tanylýyna bailanysty buzyldy. Qazir aýmaqty tazartý jáne qurylys qaldyqtaryn shyǵarý jumystary júrgizilip jatyr. Aldaǵy kúnderi qoqys tolyq shyǵarylyp, jer telimi retke keltiriledi», – dep habarlady ákimdik.
Demek, memlekettik baǵdarlama aiasynda salynǵan baspanalar paidalanýǵa berilmei jatyp-aq jaramsyz dep tanylǵan. Birneshe jyl boiy bos turǵan úiler endi súrilip jatyr. Alaida ákimdik olardyń sapasyz salynýyna kim jaýapty ekenin, biýdjet qarajatynyń jumsalýyna qandai baǵa berilgenin jáne buzý jumystarynyń shyǵyny qaidan óteletinin naqtylamaǵan. Bul suraqtarǵa quzyrly organdardyń jaýaby qajet.
Soltústik Qazaqstandaǵy turǵyn úi qurylysyna qatysty másele munymen shektelmeidi. Presnovka aýylynda jetim balalarǵa, múgedektigi bar azamattarǵa jáne kópbalaly otbasylarǵa arnap salynǵan úilerdiń qabyrǵasyn qara zeń basyp, qysta bólmelerdiń ishi qatyp qalǵan. Káriz júiesindegi aqaýlardan jaǵymsyz iis turǵyn úilerge taraǵan.
Tekserý nátijesinde Jambyl aýdanyndaǵy toǵyz memlekettik mekemeden jalpy somasy 10,4 milliard teńgeniń qarjylyq zańbuzýshylyǵy anyqtalǵan. Onyń 94 paiyzy aýdannyń turǵyn úi-kommýnaldyq sharýashylyǵy bólimine tiesili bolǵan.
Budan bólek, aýdanda quny 1,5 milliard teńgege jýyq 138 jańa úi men páter birneshe jyl boiy bos turǵan. Al jeti kelisimshart boiynsha talapqa sai kelmeitin baspanalar úshin 264 million teńge artyq tólengen.
Presnovkadaǵy septikterdiń de sapasyz salynǵany anyqtalǵan. Jer asty sýy jaqyn ornalasqandyqtan, rezervýarlar sýǵa tolyp, keibir merdigerler jumysty aiaqtamai ketken. Tipti turǵyndar qonystanǵan úilerdiń qujattary da tolyq rásimdelmegen.
Aýdit qorytyndysynan keiin aýdandyq turǵyn úi-kommýnaldyq sharýashylyǵy bóliminiń basshysy qyzmetinen bosatylyp, materialdar oblystyq prokýratýraǵa joldanǵan.
