Qazaqstannyń halyq ártisi Merýert Ótekeshova "Qyz Jibek" filminde kigen qamzolynyń áli kúnge deiin ózinde saqtaýly turǵanyn aitty. Aktrisa qundy jádigerdi mýzeige tapsyrýǵa nietti bolǵanymen, ázirge bul iske asyqpai otyr. Bul týraly óner iesi "Qazaqstan" telearnasyna bergen suhbatynda málimdedi, dep habarlaidy ult.kz.
Aktrisanyń sózinshe, kópshiliktiń qyzyǵýshylyǵyn týdyrǵan tarihi qamzoldy aldymen qalpyna keltirip, tiisti kútimnen ótkizý qajet. Sodan keiin ǵana ony mýzei qoryna ótkizýdi josparlap otyr.
"Qyz Jibektiń qamzoly ózimde saqtaýly. Ony áli retke keltirýim kerek. Daiyn bolǵanda mýzeige tapsyramyn. Kinostýdiiada Qyz Jibektiń taǵy bir kóilegi, qamzoly men sáýkelesi bar", – dedi aktrisa.
"Qundy dúnielerdiń joǵalyp ketýinen qorqamyn"
Merýert Ótekeshova úshin "Qyz Jibek" filmine qatysty árbir buiymnyń orny bólek. Ol qolynda saqtalǵan estelikter men tarihi dúnielerdi bir júiege keltirip, keleshek urpaqqa tabystaýdy kózdeidi.
Óner iesi filmniń jaryqqa shyqqanyna 50 jyl tolýyna orai derekti týyndy túsirilgenin de eske aldy. Aktrisanyń aitýynsha, qazaq kinosynyń tarihynan syr shertetin mundai dúnielerdiń umyt qalmaýy mańyzdy.
"Jastar kóre me, kórmei me, bilmeimin. Biraq maqsatym – qolymda bar dúnieni jinaqtap, jazyp, keiingi urpaqqa mura etip qaldyrý. Áli oiymda júrgen, atqaratyn isim kóp. Osy iske ózim kirispesem, qundy dúnieler joǵalyp kete me dep qorqamyn", – dedi Merýert Ótekeshova.
Aktrisa tarihi jádigerlerdi saqtap qalýdy jeke jaýapkershiligi sanaitynyn jetkizdi. Onyń pikirinshe, kino ónerine qatysty mundai muralar bolashaq urpaq úshin de qundy.
Ázirge áigili Qyz Jibektiń qamzoly aktrisanyń ózinde saqtaýly. Merýert Ótekeshova ony aldaǵy ýaqytta mýzeige ótkizýdi josparlaǵanymen, naqty merzimi men qai mýzeige tapsyrylatynyn jariialaǵan joq.
Merýert Ótekeshova kim?
Merýert Qarataiqyzy Ótekeshova – qazaqtyń belgili teatr jáne kino aktrisasy, Qazaqstannyń eńbek sińirgen ártisi. Ol 1951 jyly 25 aqpanda Oral qalasynda dúniege kelgen. 1968 jyly Almatydaǵy №66 orta mektepti támamdaǵan.
Sol jyly áigili rejisser Sultan Qojyqovtyń "Qyz Jibek" filmine basty rólge shaqyrylyp, kópshilikke keńinen tanyldy.
1973 jyly Qurmanǵazy atyndaǵy Qazaq memlekettik óner institýtyn Hadisha Bókeevanyń sheberhanasynda bitirdi. Sol jyldan bastap Muhtar Áýezov atyndaǵy Qazaq memlekettik akademiialyq drama teatrynda eńbek etti. Sahnada Qaragóz, Eńlik, Áliman syndy kúrdeli keiipkerlerdi somdady.
Aktrisa "Aǵam meniń", "Ajdaha jyly", "Aq baqsy" jáne basqa da filmderge túsken.
Ónerdegi eńbegi úshin 1982 jyly Qazaq KSR-niń eńbek sińirgen ártisi ataǵyn alyp, keiin "Qurmet" jáne "Parasat" ordenderimen marapattaldy.
Onyń ómirlik jary – "Qyz Jibek" filminde Tólegenniń rólin somdaǵan belgili akter, marqum Quman Tastanbekov.
