Tanymal ánshi Dosymjan Tańatarov óner jolyn tańdaýyna ata-anasynyń qarsy bolǵanyn aityp, jastyq shaǵyndaǵy qyzyqty oqiǵasyn bólisti. Óner iesi ánshi bolamyn dep úiinen qashyp ketkenin de jasyrmady. Bul týraly ol "Keshki Almaty" baǵdarlamasyna bergen suhbatynda baiandady, dep habarlaidy ult.kz.
Ánshiniń aitýynsha, bala kezinen ónerge jaqyn bolyp ósken. Aýyldaǵy túrli baiqaýlarǵa qatysyp, aýdandyq jáne oblystyq deńgeide de ónerimen kózge túsken. Tipti ainalasyndaǵy ustazdary men tanystary onyń bolashaǵyn sahnamen bailanystyryp, úlken úmit artqan.
Alaida mektepti támamdaǵan soń óner ýniversitetine túsýdi josparlaǵan Dosymjan Tańatarov kútpegen jaǵdaiǵa tap bolǵan. Buǵan deiin balasynyń ánshiligin qoldap kelgen ata-anasy onyń kásibi óner jolyn tańdaýyna qarsy shyqqan.
"Negizgi mamandyǵym basqa. Bul ózi qyzyq. Men án aitqanda raqattanatynmyn. Ata-anam kishkentaiymnan ónerge daiyndap ósirdi. Mektep bitirip, armanym Júrgenovke me, konservatoriiaǵa ma túsemin degen ýaqytta áke-sheshem qarsy bolady ǵoi", – dep eske aldy ánshi.
"Qarnym ashqan soń úige qaityp keldim"
Dosymjan Tańatarov ata-anasynyń bul sheshimin túsine almai, qatty renjigenin aitty. Sebebi aýyldan bastap oblysqa deiin túrli óner dodalarynda tanylyp úlgergen jas ánshi bolashaǵyn tek sahnadan kórgen. Alaida áke-sheshesi ulynyń turaqty mamandyq iesi bolǵanyn qalaǵan.
"Ata-anam ónerpaz bolmai-aq qoi dedi. Jylap, úiden qashyp kettim. Úsh kún úige túnemedim. Qarnym ash. Sol qaryn ashqan soń qaityp keldim", – dep kúldi óner iesi.
Ánshiniń sózinshe, úige oralǵan soń anasy oǵan aqyl aityp, aldymen joǵary bilim alýǵa kóndirgen.
"Balam, óleń jótel siiaqty. Syrtqa shyqpai qoimaidy. Men saǵan aitaiyn, armanyń óner bolsa da, biz úshin bir mamandyq iesi bolyp, diplom alshy. Sosyn óneriń ishińdi tesip bara jatsa, ol dúnie shyǵady. Sol jerde júrip te sahnaǵa shyǵasyń", – degen.
Ánshi bolamyn degen Dosymjan himik mamandyǵyn oqyǵan
Anasynyń aqylynan keiin Dosymjan Tańatarov ata-anasynyń tilin alyp, Jambyl tehnologiialyq institýtyna oqýǵa túsken. Ol injener tehnik-himik mamandyǵy boiynsha bilim alyp, diplom ielengen. Degenmen ánshilikke degen qyzyǵýshylyǵy eshqashan báseńdemegen.
Óner iesiniń aitýynsha, institýtqa alǵash barǵan kúni oqý ornynda "Allo, my ishem talanty" atty baiqaý ótip jatqan.
"Sol konkýrsqa jetip baryp, "Men talantpyn!" dedim", – dep kúldi ánshi.
Dosymjan Tańatarov óziniń óner joly dál sol baiqaýdan bastalǵanyn jetkizdi. Osylaisha ol ata-anasynyń talabyn oryndap, basqa mamandyqty meńgerse de, bala kúngi armanynan qol úzbegen.
Ánshiniń áńgimesin tyńdaǵan júrgizýshi Janbolat Naizabekov:
"Institýtty Júrgenov qylyp tastapsyz ǵoi", – dep ázildep, stýdiiadaǵylardy kúldirdi.
Osylaisha Dosymjan Tańatarov ata-anasynyń qarsylyǵy men mamandyq tańdaý kezindegi qiyndyqtarǵa qaramastan, ánshilik ónerge qalai kelgenin eske aldy.
Dosymjan Tańatarov kim?
Dosymjan Qarpyquly Tańatarov – qazaqstandyq estrada ánshisi, Qazaqstannyń eńbek sińirgen qairatkeri. Ol 1975 jyly 6 mamyrda Jambyl oblysy, Turar Rysqulov aýdanyna qarasty Qumaryq aýylynda dúniege kelgen.
Mektepti aiaqtaǵan soń Jambyl tehnologiialyq institýtynda injener-tehnolog, himik mamandyǵy boiynsha bilim alǵan. Keiin Jambyl pedagogikalyq institýtynda mýzyka mamandyǵyn meńgergen.
2000 jyldan bastap Qazaqstan Respýblikasy Prezidenti orkestrinde ánshi bolyp qyzmet atqarǵan. 2001 jyly onyń "Quralai" atty alǵashqy beinebaiany jaryq kórdi.
Al 2005 jyly Almatydaǵy Respýblika saraiynda "Quralai" atty jeke shyǵarmashylyq keshin ótkizdi.
Ónerdegi jetistikteri úshin 2008 jyly "Daryn" memlekettik jastar syilyǵyn ielenip, 2009 jyly Qazaqstannyń eńbek sińirgen qairatkeri atandy.
2021 jyly Prezident orkestrindegi jiyrma jyldyq qyzmetin aiaqtap, maior shenimen zeinetke shyqty.
2023 jyldyń mamyr aiynda Astana qalasyndaǵy Jastar teatrynyń direktory qyzmetine taǵaiyndaldy.
