Abai oblysynda respýblikalyq «Taza Qazaqstan» ekologiialyq aktsiiasy aiasynda Ertis ózenine 22 myń Sibir bekiresiniń shabaǵy jiberildi. Balyqtandyrý jumystary 29–30 qazan kúnderi oblystyq tabiǵi resýrstar jáne tabiǵat paidalanýdy retteý basqarmasynyń bastamasymen uiymdastyryldy.
Shara Jańasemei aýdanyna qarasty Krýpskoe aýyly mańynda ótti. Ózenge jiberilgen shabaqtardyń 8 myńy – salmaǵy keminde 150 gramm bolatyn bir jyldyq balyqtar, al 14 myńy – biyl ósirilgen, salmaǵy keminde 20 gramm bolatyn shabaqtar.
Balyqtandyrý jumystary Shyǵys Qazaqstan oblysy Ulan aýdanynyń Saratovka aýyldyq okrýginde ornalasqan «Ost Fish» JShS balyq ósirý kásipornynyń qatysýymen júzege asyryldy.
Sibir bekiresi – sý ekojúiesi úshin mańyzy zor, qorǵaýdy jáne tabiǵi popýliatsiiasyn qalpyna keltirýdi qajet etetin baǵaly balyq túri. Mundai jumystar ózendegi balyq qoryn tolyqtyrýǵa, biologiialyq ártúrlilikti saqtaýǵa jáne sý bioresýrstarynyń tabiǵi ósimine qolaily jaǵdai jasaýǵa baǵyttalǵan.
Abai oblysynyń tabiǵi resýrstar jáne tabiǵat paidalanýdy retteý basqarmasy 2023 jyldan beri balyqtandyrý jumystaryn jyl saiyn turaqty túrde júrgizip keledi. Bul bastamalar sý aidyndarynyń ekologiialyq tepe-teńdigin saqtaýǵa jáne óńirdiń tabiǵi bailyǵyn qorǵaýǵa úles qosady.
«Taza Qazaqstan» aktsiiasy aiasynda júzege asyrylǵan bul shara tabiǵi resýrstardy saqtaý men qorshaǵan ortaǵa jaýapkershilikpen qaraýdyń mańyzyn taǵy bir márte kórsetti.
