Búginde elge tanymal ánshiler men akterlerdiń barlyǵy birdei óner jolyna ata-anasynyń aq batasymen qadam baspaǵan. Biriniń ákesi balasynyń turaqty jumysy bolǵanyn qalasa, endi biriniń anasy sahna ómirinen qaýiptengen. Tipti ónerge túskisi kelgen qyzyna qatań shart qoiǵan ata-analar da bar. Soǵan qaramastan óz tańdaýynan bas tartpaǵan juldyzdar búginde kópshiliktiń yqylasyna bólenip júr. Ult.kz tilshisi tanymal óner ieleriniń ár jyldary bergen suhbattaryna súienip, olardyń shyǵarmashylyq jolyndaǵy otbasylyq kelispeýshilikterdi eske aldy.
1. Bibigúl Tólegenova: Anasy Almatyǵa baryp, ánshi bolýyna qarsy bolǵan
Qazaqtyń áigili ánshisi, KSRO halyq ártisi Bibigúl Tólegenovanyń da óner joly birden bastala qoimaǵan. Onyń Almatyǵa baryp, mýzykamen kásibi ainalysýyna anasy bastapqyda qarsy bolǵan.
Óner iesi bul týraly 2024 jyly "Qazaqstan" telearnasyndaǵy "Tańsholpan" baǵdarlamasynda áńgimeledi.
Ánshiniń aitýynsha, 17–18 jasynda óner qýyp, Almatyǵa attanǵysy kelgen. Alaida anasy qyzynyń bóten qalaǵa ketip, ártis bolýyn qup kórmegen. Ol kezde kei adamdar óner ortasynda júrgen qyzdardyń bolashaǵyna kúmánmen qaraityn. Anasy qyzynyń bilimin aiaqtamai, turmysqa shyǵyp, ónerden qol úzip qalýynan qaýiptengen. Biraq Bibigúl Tólegenovanyń ánshilikke degen yntasy basym túsken.
"Biraq, meniń sonshama qushtarlyǵym boldy", – dep eske aldy ánshi.
Óner iesi ómirindegi qiyndyqtardy ánniń arqasynda eńsergenin, shyǵarmashylyǵy ózine kúsh bergenin jetkizgen.
Qyzyǵy, ýaqytynda ánshilik jolǵa alańdaýshylyq tanytqan anasy keiin qyzynyń balalaryna qamqor bolyp, oǵan úlken qoldaý kórsetken.
2. Nurbolat Abdýllin: Ákesi ánshi emes, júrgizýshi bolǵanyn qalaǵan
Tanymal ánshi Nurbolat Abdýllindi kishkentaiynan ónerge baýlyǵan adam – anasy. Bolashaq ánshi nebári bes-alty jasynda sahnaǵa shyǵyp, dombyra shertip, dástúrli ánderdi úirene bastaǵan.
Alaida anasy balasynyń ónerge jaqyn bolǵanyn qalasa, ákesiniń pikiri múlde basqa edi. Ákesi ánshilikti turaqty tabys ákeletin mamandyq sanamaǵan. Sondyqtan ulynyń sahnada júrgeninen góri kólik júrgizip, nápaqasyn tapqanyn jón kórgen. Nurbolat Abdýllin bul týraly Hit-TV arnasyna bergen suhbatynda aitqan.
"Ártiste aqsha bolmaidy ǵoi, anda-munda júredi", – dep ákesiniń sózin eske alǵan.
Ánshiniń aitýynsha, ol kezde ákesi óner adamdarynyń bir orynda turaqtamai, únemi saparda júretinin meńzegen. Keiin Nurbolat ózi de shyǵarmashylyq kásiptiń ońai emestigin túsingenin jetkizdi.
Ákesiniń bastapqy kúmánine qaramastan, ánshi kásibi sahnaǵa shyǵyp, estradada óz tyńdarmanyn tapty. Keiin akterlik ónerde de baǵyn synap, birneshe otandyq telehikaiaǵa tústi.
3. Juldyz Ábdikárimova: Ákesi ónerge barýyna bir ǵana shartpen kelisken
Aktrisa Juldyz Ábdikárimovanyń ónerge kelýine de ákesi bastapqyda qarsy bolǵan. Onyń oiynsha, sahna – ásirese qyz bala úshin aýyr ári jaýapkershiligi mol orta.
Alaida bolashaq aktrisa toǵyzynshy synypty aiaqtaǵan soń óner kolledjine túsýdi maqsat etken.
Qyzynyń talabyn baiqaǵan ákesi aqyry kelisim bergenimen, aldyna bir shart qoiǵan. Juldyz oqýǵa alǵashqy múmkindiginde túsýge tiis bolǵan. Eger synaqtan óte almasa, óner jolyna barmaýy kerek edi. Aktrisa bul oqiǵany 2022 jyly bergen suhbatynda eske aldy.
"Sóitip, ákemniń sharty boiynsha, oqýǵa alǵashqy tapsyrǵannan-aq túsip kettim", – dedi aktrisa.
Ol osy sátten bastap óz qabiletine senimi artqanyn aitqan. Oqýyn aiaqtaǵannan keiin teatrda alty ai jumys istegen.
Kolledjde júrgende bolashaq jary Qairat Nurtaspen tanysqan Juldyz Ábdikárimova keiin otbasyn quryp, biraz ýaqyt shyǵarmashylyqtan qol úzgen. Degenmen akterlik mamandyqty tańdaýyna ákesiniń bir ǵana múmkindik bergeni onyń ómirindegi este qalarlyq oqiǵalardyń biri bolyp qalǵan.
4. Muhtar Hanzada: Ákesi balasynyń biznespen ainalysqanyn qalaǵan
Estrada ánshisi Muhtar Hanzada da ákesiniń ónerge degen kózqarasy týraly ashyq aitqan.
Ol 2022 jyly "Juldyz" radiosyndaǵy Zhuldyz LIVE jobasyna qatysyp, ákesiniń áli de kásipkerlikpen ainalysqanyn qup kóretinin jetkizdi. Ánshiniń sózinshe, ákesi balasynyń bar ómirin mýzykaǵa arnaǵanyn qalamaǵan. Onyń ornyna jeke kásip bastap, basqa salada tabys tapqanyn durys sanaǵan.
"Basqa kásippen ainalys", – dep ákesiniń aqylyn jetkizgen ánshi.
Muhtar Hanzada sol suhbatynda ákesiniń burynǵydai úzildi-kesildi qarsy emes ekenin de túsindirgen. Anasy balasynyń ózine unaityn ispen ainalysqanyn qoldaǵan. Ápkeleri de onyń óner jolyn tańdaǵanyn túsindirýge kómektesken. Ánshi ákesiniń kózqarasyn ázil aralas sipattap, eger qazir mýzykadan ketetinin aitsa, onyń nelikten mundai sheshim qabyldaǵanyn suramaitynyn jetkizgen.
Degenmen Muhtar Hanzada shyǵarmashylyǵyn jalǵastyryp, ánshilik jolyn tańdady.
5. Rýhiia Baidúkenova: Otbasy onyń ánshi bolǵanyn qalamaǵan
"Slavian bazary" halyqaralyq baiqaýynda jeńiske jetken qazaqstandyq ánshi Rýhiia Baidúkenovanyń da shyǵarmashylyq jolyndaǵy alǵashqy qadamdary qiyndyqsyz ótpegen.
Ánshi 2021 jyly "Habar 24" telearnasynyń Next baǵdarlamasyna bergen suhbatynda otbasynyń onyń ónerge bet burýyn quptamaǵanyn aitqan. Rýhiianyń áýletinde ónerge jaqyn adamdar bolǵan. Máselen, atasy dombyra shertip, kúi tartyp, án salǵan. Ol konservatoriiada da oqyǵan, alaida soǵys bastalǵandyqtan bilimin aiaqtai almaǵan.
Atasy nemeresiniń ónerge jaqyn bolǵanyn qalaǵanymen, ata-anasy onyń kásibi ánshi bolýyn qoldamaǵan.
"Biraq ónerge barǵanymdy qalamady, ol maǵan qiyn boldy", – dedi Rýhiia.
Ánshi bul jaǵdaidyń ózine ońai timegenin jasyrmaǵan. Soǵan qaramastan armanynan bas tartpai, túrli mýzykalyq baiqaýlarǵa qatysýyn jalǵastyrǵan. Ol "Slavian bazaryna" úsh jyl qatarynan irikteýden óte almaǵanyn da aitqan. Alaida talpynysyn toqtatpaǵan óner iesi 2021 jyly baiqaýdyń bas júldesin jeńip aldy.
Rýhiianyń aitýynsha, halyqaralyq baiqaýǵa attanar aldynda ákesi oǵan aq batasyn bergen.
Osylaisha, kezinde qyzynyń ánshi bolǵanyn qalamaǵan otbasy keiin onyń mańyzdy shyǵarmashylyq qadamyna qoldaý bildirgen.
Arman jolyndaǵy tańdaý
Búginde elge tanylǵan bul óner ieleriniń árqaisysy kezinde óz tańdaýyn jaqyndaryna túsindirýge májbúr bolǵan. Biriniń ata-anasy ánshilikten turaqty tabys tabýǵa kúmándansa, endi biri sahna ómiriniń qiyndyǵyna alańdaǵan. Degenmen olar óz armandarynan bas tartpai, ónerde oryn taba bildi. Ýaqyt óte keibiriniń ata-anasy da kózqarasyn ózgertip, balalarynyń jetistigine qýandy.
Bul oqiǵalar juldyzdardyń tanymaldyqqa jetý jolynda otbasylyq qoldaý men óz maqsatyna degen senimniń qanshalyqty mańyzdy ekenin kórsetedi.
