بٷگٸندە ەلگە تانىمال ەنشٸلەر مەن اكتەرلەردٸڭ بارلىعى بٸردەي ٶنەر جولىنا اتا-اناسىنىڭ اق باتاسىمەن قادام باسپاعان. بٸرٸنٸڭ ەكەسٸ بالاسىنىڭ تۇراقتى جۇمىسى بولعانىن قالاسا, ەندٸ بٸرٸنٸڭ اناسى ساحنا ٶمٸرٸنەن قاۋٸپتەنگەن. تٸپتٸ ٶنەرگە تٷسكٸسٸ كەلگەن قىزىنا قاتاڭ شارت قويعان اتا-انالار دا بار. سوعان قاراماستان ٶز تاڭداۋىنان باس تارتپاعان جۇلدىزدار بٷگٸندە كٶپشٸلٸكتٸڭ ىقىلاسىنا بٶلەنٸپ جٷر. Ult.kz تٸلشٸسٸ تانىمال ٶنەر يەلەرٸنٸڭ ەر جىلدارى بەرگەن سۇحباتتارىنا سٷيەنٸپ, ولاردىڭ شىعارماشىلىق جولىنداعى وتباسىلىق كەلٸسپەۋشٸلٸكتەردٸ ەسكە الدى.
1. بيبٸگٷل تٶلەگەنوۆا: اناسى الماتىعا بارىپ, ەنشٸ بولۋىنا قارسى بولعان
قازاقتىڭ ەيگٸلٸ ەنشٸسٸ, كسرو حالىق ەرتٸسٸ بيبٸگٷل تٶلەگەنوۆانىڭ دا ٶنەر جولى بٸردەن باستالا قويماعان. ونىڭ الماتىعا بارىپ, مۋزىكامەن كەسٸبي اينالىسۋىنا اناسى باستاپقىدا قارسى بولعان.
ٶنەر يەسٸ بۇل تۋرالى 2024 جىلى "Qazaqstan" تەلەارناسىنداعى "تاڭشولپان" باعدارلاماسىندا ەڭگٸمەلەدٸ.
ەنشٸنٸڭ ايتۋىنشا, 17–18 جاسىندا ٶنەر قۋىپ, الماتىعا اتتانعىسى كەلگەن. الايدا اناسى قىزىنىڭ بٶتەن قالاعا كەتٸپ, ەرتٸس بولۋىن قۇپ كٶرمەگەن. ول كەزدە كەي ادامدار ٶنەر ورتاسىندا جٷرگەن قىزداردىڭ بولاشاعىنا كٷمەنمەن قارايتىن. اناسى قىزىنىڭ بٸلٸمٸن اياقتاماي, تۇرمىسقا شىعىپ, ٶنەردەن قول ٷزٸپ قالۋىنان قاۋٸپتەنگەن. بٸراق بيبٸگٷل تٶلەگەنوۆانىڭ ەنشٸلٸككە دەگەن ىنتاسى باسىم تٷسكەن.
"بٸراق, مەنٸڭ سونشاما قۇشتارلىعىم بولدى", – دەپ ەسكە الدى ەنشٸ.
ٶنەر يەسٸ ٶمٸرٸندەگٸ قيىندىقتاردى ەننٸڭ ارقاسىندا ەڭسەرگەنٸن, شىعارماشىلىعى ٶزٸنە كٷش بەرگەنٸن جەتكٸزگەن.
قىزىعى, ۋاقىتىندا ەنشٸلٸك جولعا الاڭداۋشىلىق تانىتقان اناسى كەيٸن قىزىنىڭ بالالارىنا قامقور بولىپ, وعان ٷلكەن قولداۋ كٶرسەتكەن.
2. نۇربولات ابدۋللين: ەكەسٸ ەنشٸ ەمەس, جٷرگٸزۋشٸ بولعانىن قالاعان
تانىمال ەنشٸ نۇربولات ابدۋلليندٸ كٸشكەنتايىنان ٶنەرگە باۋلىعان ادام – اناسى. بولاشاق ەنشٸ نەبەرٸ بەس-التى جاسىندا ساحناعا شىعىپ, دومبىرا شەرتٸپ, دەستٷرلٸ ەندەردٸ ٷيرەنە باستاعان.
الايدا اناسى بالاسىنىڭ ٶنەرگە جاقىن بولعانىن قالاسا, ەكەسٸنٸڭ پٸكٸرٸ مٷلدە باسقا ەدٸ. ەكەسٸ ەنشٸلٸكتٸ تۇراقتى تابىس ەكەلەتٸن ماماندىق ساناماعان. سوندىقتان ۇلىنىڭ ساحنادا جٷرگەنٸنەن گٶرٸ كٶلٸك جٷرگٸزٸپ, نەپاقاسىن تاپقانىن جٶن كٶرگەن. نۇربولات ابدۋللين بۇل تۋرالى Hit-TV ارناسىنا بەرگەن سۇحباتىندا ايتقان.
"ەرتٸستە اقشا بولمايدى عوي, اندا-مۇندا جٷرەدٸ", – دەپ ەكەسٸنٸڭ سٶزٸن ەسكە العان.
ەنشٸنٸڭ ايتۋىنشا, ول كەزدە ەكەسٸ ٶنەر ادامدارىنىڭ بٸر ورىندا تۇراقتاماي, ٷنەمٸ ساپاردا جٷرەتٸنٸن مەڭزەگەن. كەيٸن نۇربولات ٶزٸ دە شىعارماشىلىق كەسٸپتٸڭ وڭاي ەمەستٸگٸن تٷسٸنگەنٸن جەتكٸزدٸ.
ەكەسٸنٸڭ باستاپقى كٷمەنٸنە قاراماستان, ەنشٸ كەسٸبي ساحناعا شىعىپ, ەسترادادا ٶز تىڭدارمانىن تاپتى. كەيٸن اكتەرلٸك ٶنەردە دە باعىن سىناپ, بٸرنەشە وتاندىق تەلەحيكاياعا تٷستٸ.
3. جۇلدىز ەبدٸكەرٸموۆا: ەكەسٸ ٶنەرگە بارۋىنا بٸر عانا شارتپەن كەلٸسكەن
اكتريسا جۇلدىز ەبدٸكەرٸموۆانىڭ ٶنەرگە كەلۋٸنە دە ەكەسٸ باستاپقىدا قارسى بولعان. ونىڭ ويىنشا, ساحنا – ەسٸرەسە قىز بالا ٷشٸن اۋىر ەرٸ جاۋاپكەرشٸلٸگٸ مول ورتا.
الايدا بولاشاق اكتريسا توعىزىنشى سىنىپتى اياقتاعان سوڭ ٶنەر كوللەدجٸنە تٷسۋدٸ ماقسات ەتكەن.
قىزىنىڭ تالابىن بايقاعان ەكەسٸ اقىرى كەلٸسٸم بەرگەنٸمەن, الدىنا بٸر شارت قويعان. جۇلدىز وقۋعا العاشقى مٷمكٸندٸگٸندە تٷسۋگە تيٸس بولعان. ەگەر سىناقتان ٶتە الماسا, ٶنەر جولىنا بارماۋى كەرەك ەدٸ. اكتريسا بۇل وقيعانى 2022 جىلى بەرگەن سۇحباتىندا ەسكە الدى.
"سٶيتٸپ, ەكەمنٸڭ شارتى بويىنشا, وقۋعا العاشقى تاپسىرعاننان-اق تٷسٸپ كەتتٸم", – دەدٸ اكتريسا.
ول وسى سەتتەن باستاپ ٶز قابٸلەتٸنە سەنٸمٸ ارتقانىن ايتقان. وقۋىن اياقتاعاننان كەيٸن تەاتردا التى اي جۇمىس ٸستەگەن.
كوللەدجدە جٷرگەندە بولاشاق جارى قايرات نۇرتاسپەن تانىسقان جۇلدىز ەبدٸكەرٸموۆا كەيٸن وتباسىن قۇرىپ, بٸراز ۋاقىت شىعارماشىلىقتان قول ٷزگەن. دەگەنمەن اكتەرلٸك ماماندىقتى تاڭداۋىنا ەكەسٸنٸڭ بٸر عانا مٷمكٸندٸك بەرگەنٸ ونىڭ ٶمٸرٸندەگٸ ەستە قالارلىق وقيعالاردىڭ بٸرٸ بولىپ قالعان.
4. مۇحتار حانزادا: ەكەسٸ بالاسىنىڭ بيزنەسپەن اينالىسقانىن قالاعان
ەسترادا ەنشٸسٸ مۇحتار حانزادا دا ەكەسٸنٸڭ ٶنەرگە دەگەن كٶزقاراسى تۋرالى اشىق ايتقان.
ول 2022 جىلى "جۇلدىز" راديوسىنداعى Zhuldyz LIVE جوباسىنا قاتىسىپ, ەكەسٸنٸڭ ەلٸ دە كەسٸپكەرلٸكپەن اينالىسقانىن قۇپ كٶرەتٸنٸن جەتكٸزدٸ. ەنشٸنٸڭ سٶزٸنشە, ەكەسٸ بالاسىنىڭ بار ٶمٸرٸن مۋزىكاعا ارناعانىن قالاماعان. ونىڭ ورنىنا جەكە كەسٸپ باستاپ, باسقا سالادا تابىس تاپقانىن دۇرىس ساناعان.
"باسقا كەسٸپپەن اينالىس", – دەپ ەكەسٸنٸڭ اقىلىن جەتكٸزگەن ەنشٸ.
مۇحتار حانزادا سول سۇحباتىندا ەكەسٸنٸڭ بۇرىنعىداي ٷزٸلدٸ-كەسٸلدٸ قارسى ەمەس ەكەنٸن دە تٷسٸندٸرگەن. اناسى بالاسىنىڭ ٶزٸنە ۇنايتىن ٸسپەن اينالىسقانىن قولداعان. ەپكەلەرٸ دە ونىڭ ٶنەر جولىن تاڭداعانىن تٷسٸندٸرۋگە كٶمەكتەسكەن. ەنشٸ ەكەسٸنٸڭ كٶزقاراسىن ەزٸل ارالاس سيپاتتاپ, ەگەر قازٸر مۋزىكادان كەتەتٸنٸن ايتسا, ونىڭ نەلٸكتەن مۇنداي شەشٸم قابىلداعانىن سۇرامايتىنىن جەتكٸزگەن.
دەگەنمەن مۇحتار حانزادا شىعارماشىلىعىن جالعاستىرىپ, ەنشٸلٸك جولىن تاڭدادى.
5. رۋحييا بايدٷكەنوۆا: وتباسى ونىڭ ەنشٸ بولعانىن قالاماعان
"سلاۆيان بازارى" حالىقارالىق بايقاۋىندا جەڭٸسكە جەتكەن قازاقستاندىق ەنشٸ رۋحييا بايدٷكەنوۆانىڭ دا شىعارماشىلىق جولىنداعى العاشقى قادامدارى قيىندىقسىز ٶتپەگەن.
ەنشٸ 2021 جىلى "حابار 24" تەلەارناسىنىڭ Next باعدارلاماسىنا بەرگەن سۇحباتىندا وتباسىنىڭ ونىڭ ٶنەرگە بەت بۇرۋىن قۇپتاماعانىن ايتقان. رۋحييانىڭ ەۋلەتٸندە ٶنەرگە جاقىن ادامدار بولعان. مەسەلەن, اتاسى دومبىرا شەرتٸپ, كٷي تارتىپ, ەن سالعان. ول كونسەرۆاتورييادا دا وقىعان, الايدا سوعىس باستالعاندىقتان بٸلٸمٸن اياقتاي الماعان.
اتاسى نەمەرەسٸنٸڭ ٶنەرگە جاقىن بولعانىن قالاعانىمەن, اتا-اناسى ونىڭ كەسٸبي ەنشٸ بولۋىن قولداماعان.
"بٸراق ٶنەرگە بارعانىمدى قالامادى, ول ماعان قيىن بولدى", – دەدٸ رۋحييا.
ەنشٸ بۇل جاعدايدىڭ ٶزٸنە وڭاي تيمەگەنٸن جاسىرماعان. سوعان قاراماستان ارمانىنان باس تارتپاي, تٷرلٸ مۋزىكالىق بايقاۋلارعا قاتىسۋىن جالعاستىرعان. ول "سلاۆيان بازارىنا" ٷش جىل قاتارىنان ٸرٸكتەۋدەن ٶتە الماعانىن دا ايتقان. الايدا تالپىنىسىن توقتاتپاعان ٶنەر يەسٸ 2021 جىلى بايقاۋدىڭ باس جٷلدەسٸن جەڭٸپ الدى.
رۋحييانىڭ ايتۋىنشا, حالىقارالىق بايقاۋعا اتتانار الدىندا ەكەسٸ وعان اق باتاسىن بەرگەن.
وسىلايشا, كەزٸندە قىزىنىڭ ەنشٸ بولعانىن قالاماعان وتباسى كەيٸن ونىڭ ماڭىزدى شىعارماشىلىق قادامىنا قولداۋ بٸلدٸرگەن.
ارمان جولىنداعى تاڭداۋ
بٷگٸندە ەلگە تانىلعان بۇل ٶنەر يەلەرٸنٸڭ ەرقايسىسى كەزٸندە ٶز تاڭداۋىن جاقىندارىنا تٷسٸندٸرۋگە مەجبٷر بولعان. بٸرٸنٸڭ اتا-اناسى ەنشٸلٸكتەن تۇراقتى تابىس تابۋعا كٷمەندانسا, ەندٸ بٸرٸ ساحنا ٶمٸرٸنٸڭ قيىندىعىنا الاڭداعان. دەگەنمەن ولار ٶز ارماندارىنان باس تارتپاي, ٶنەردە ورىن تابا بٸلدٸ. ۋاقىت ٶتە كەيبٸرٸنٸڭ اتا-اناسى دا كٶزقاراسىن ٶزگەرتٸپ, بالالارىنىڭ جەتٸستٸگٸنە قۋاندى.
بۇل وقيعالار جۇلدىزداردىڭ تانىمالدىققا جەتۋ جولىندا وتباسىلىق قولداۋ مەن ٶز ماقساتىنا دەگەن سەنٸمنٸڭ قانشالىقتى ماڭىزدى ەكەنٸن كٶرسەتەدٸ.
